Tura: Ja gittam mangna jangbingbangani ja·mano, bon·kamao official gita ong·aha, jeon Meghalayani gitcham Speaker AT Mondal, National People’s Party (NPP)-o napangaha aro uan re·baenggipa 2023 assembly election-o Phulbari constituency-o NPP-ni party candidate-ba ong·aignok ine parakaha.
Iani gisepon, da·o apsan constituency-o NPP MLA ong·enggipa SG Esmatur Mominin-na mikkangchina sing·ani ong·engaha aroba AITC, uko mikkangchina MLA ong·taina chol on·genma on·jawa uaba mingsa sing·ani ong·enga.
Mondal-ko party-o rimnapna re·chakkatani bilsisa mangna skangonin a·bachengaha, jeon Shyamnagar MDC, Habibuz Zaman, jean Congress-oni ong·katani ja·mano ua somoimitingo AITC baksa ong·achim, jean GHADC-o bil tosusaaniko dakmiting somoio NPP-ni nangrime rikenggipa council-ko tangatgipa ong·ahachim. Zaman, NPP-ni nangrime rikgipa dolna puonahachim, jeon ia gimikan Mondal-ni dakchakanichisa ong·baaha ine janganirangba ong·aha, jeon Zaman-ni MDC man·baanio Mondal-an mongsonggipa ong·skaachim.
Bilsisana skangon, Mondal NPP candidate ong·nasienga ine dilgiparangni gisepo agangrikgiminko Mondal-ni, uni constituency-ona wenangmiting somoio una chakgiparang agantokahachim.
Unomitingo, Esmatur Mominin-ko All India Trinamool Congress (AITC)-o ja·napatskangna gita MLA-na chakgiparang agangrikanirangni daktokenga.
AITC-ni batanggimin programrangoba Esmatur Mominin-na chakgipa aro dakchakgiparangni dongpaanirangko nikna man·aha. Uamang indakeba ka·dongenga je AITC, uamangna susana gita tikit on·asan ong·aiajwa election-o chena gitaba cholrangko dake on·gen, jeon biapmanchaona re·angen nigenchimode election-o susaanio bilgrik ong·nasusu nikenga.
Re·anggipa pujani somoio Phulbari aro Chibinango donggipa Durga puja pandalrangona AITC dilgipa Dr Mukul Sangma baksa apsan re·angonin AITC-o napna gita Mominin-ni ja·ku de·ani a·bachengbaaha. Aro Mominin-ni re·mikkangani gimin uko ja·rikgiparangba social mediarango paraktokahachim.
Mominin-ko AITC-ni gita Phulbari-o uamangni candate-na seokaignok ine gisiko nikatgenchimoba, official gita tik ong·e paraksrangade dongkujaenga.
“Bebegita AT Mondal a·gipi ong·sogimin ong·oba Rajabal aro Selsella-ni mitam jolrangode Mominin-ni bil batskaaigen aro AITC uarangon an·tangtangna cholko dakgen” ine Phulbario songdonggipa saksa chanchiatangko parakaha.
