WGH-o gital Jengjal Civil Sub-Division-ko songa

Integrated Health Complex-na pangchakaniko songe on·angjola

TURA: West Garo Hills a·jani gital Jengjal Civil Sub-Division-ko Sombar salo, a·dokni Chief Minister Conrad K Sangma-ni jakchi songe on·angaha aro ia gital sub-division-ko songe on·anganio, jolni MLA James PK Sangma, Williamnagar MLA Marcuise N Marak, Chief Minister-ni Advisor Thomas A Sangma, Manipur a·dokni MLA Rameshwar Singh, West Garo Hills a·jani Deputy Commissioner Swapnil Tembe aro dingtang dingtang officer-rangba dongpae bakko ra·angaha.
Ia apsan somoion Jengjal-o rikna sienggipa Integrated Health Complex-naba Chief Minister, pangchakaniko songe on·angjolaha.
Ia apsan salon, Meghalaya Farmers Day-koba ia biapo maniangjolaha aro ia manianiona dingtang dingtang biaprangoni bang·bea game ge·e cha·giparang tom·bae bakko ra·angtokaha.
Jengjal Civil Sub-Division-ko songe on·angani somoio a·dokni Chief Minister, jinmana aganprakangengon, ian Jengjal jolrango songdongenggipa manderangna gisik ra·beani sal ong·aha ine janapatenba, Jengjal Civil Sub-Division-ko songaniara jolni manderangna sorkarini kamrangko sepangbatatani gita ong·gnok ine parakataha.
Jengjal jolrango bang·en namroro silroroani kamrangko sorkari ra·bana siengkua ine janapatengon, iani namgniko Jengjal jolrango songdongenggipa manderangsan ong·aigija Garo Hills gimikni manderangan man·tokna gita sienga ine Chief Minister parakataha.
Sorkarini ra·gate on·gipa FOCUS aro FOCUS plus program-ni gimin talate on·angengon, FOCUS+ program-ni ning·o sak 60,000 game ge·e cha·giparang namgnirangko man·aha aro mikkangchiba bang·en game ge·e cha·giparang namgnirangko man·angkugen ine Chief Minister parakataha.
Ia tom·anio a·dokni Chief Minister, Self Help Group (SHG)-rangna on·enggipa dakchakanirang aro jila kaanirangko dake cha·enggipa manderangni namgnina sorkarini ra·gatgipa PROGRESS scheme-ni giminba agan-talate on·angjolaha.
Ia Jengjal Civil Sub-Division-ko songani somoio jolni MLA aro a·dokni Health Minister James K Sangma-ba jinmana aganprakengon, ian Jengjal jolo songdongenggipa manderangna gisik ra·beani sal ong·enga ine Jengjal-ko Civil Sub-Division songe on·ahani gimin a·dokni Chief Minister-ko mittelpilangaha.
Jengjal-ko da·o Civil Sub-Division songahani gimin jolni manderang, biaptangon donge sorkarini kamrangko ra·na man·gnok ineba ua aganaha.
Jengjal-o Integrated Health Complex-ko rikna siengani gimin an·tangni kusi ong·aniko parakatengon, Jengjal jolara Garo Hills-ni bijangchi gita ong·e ia biapo Integrated Health Complex-ko kulianiara pilak biapni manderangnan namgni ong·gnok ine a·dokni Health Minister parakataha.
Jengjal Civil Sub-Division-o West Garo Hills a·jani Additional Deputy Commissioner (ADC) Leena Daring, SDO ong·e kamko ka·anggen.

Get real time updates directly on your device, subscribe now.

Comments are closed.