TURA: NRLM self help group (SHG)-rangni Retail Outlet ba dokkanko Mongolbar salo, West Garo Hills a·jani Deputy Commissioner Swapnil Tembe, Tura-ni DRDA office building-o kulie on·angaha.
Ia Retail Outlet-o West Garo Hills a·jao donggipa dingtang dingtang SHG-rangni tarigimin wata chengani, sika koani aro ma·manti cha·ani bosturangko palengachim. Ia Retail Outlet-o Rongram, Dalu, Selsella, Gambegre, Dadenggre, Tikrikilla aro Demdema C&RD Block-rango donggipa SHG-rangni tarigipa cha·ani aro gipin bosturangko, an·tangtangni counter-rango donataha aro ia biap te·rikoniko tarigipa bosturang, acharrang, chips-rang, biscuit-rang aro dingtang dingtang bosturangkoba man·enga.
Ia SHG-rangni Retail Outlet-ko kulie on·angani somoio West Garo Hills a·jani Deputy Commissioner, jinmana aganprakatengon, NRLM-ni miksonganian an·tangtangni kam ka·e cha·aniko aro kangal cholgrirangni dolko tang·doatna kam ka·anian ong·ani gimin SHG-ni membor-rang, an·tangtangni bosturangko palenba janggi tangani cholrangko man·china gita uamangni changa sapanirangko namdapatchina didina nanga ine parakataha.
Dingtang dingtang department-ni program-rangko ong·atanio, cha·ani aro dingtang dingtang bosturangko ia Retail Outlet-oniko bree jakkalchina gitaba ua dingtang dingtang department-ni officer-rangko didiangaha.
Ia tom·anio West Garo Hills DRDA-ni Project Director Dolrich BG Momin-ba jinmana aganprakangengon, ia retail outlet-ko kulianiara SHG-rangni ma·manti bosturangko palna aro SHG membor-rangni janggi tangani gadangko namdapatna dakchakani ong·gen ine an·tangni ka·dongchakenganiko parakangaha.
Ia SHG-rangni Retail Outlet-ko kulianio dongpae bakko ra·anggipa gipin manderangara, ADC Rezia Ch Sangma, ADC Shelley Momin, ADC Rojalinda D Shira, ADC Winje Momin, ADC Maryliza K Marak aro gipinrang ong·a.
