SHILLONG: Re·baenggipa 2023 bilsiode National People’s Party (NPP), an·tangarian sorkariko rikna man·aigen ine NPP-ni national vice president aro a·dokni deputy chief minister Prestone Tynsong, an·tangni ka·dongchakenganiko parakataha.
“Chinga election-na tarisomanaha aro ia election-o bilaken warachakna nisengsoenga. Re·baenggipa 2023 bilsini election ja·man chinga an·tangarian sorkariko rikgnok,” ine Tynsong, kobor ra·timgiparangna parakataha.
Ia chang election-o uamangna badiaba dolrang kenchakna nangani ong·engama ine sing·on, Meghalaya a·dokode election-rang gipinrango gita ong·jani gimin uamang darang dolnaba kenna nangani dongja aro gipin dolrangba NPP-na kenna nangani dongjawa ine Tynsong parakataha.
“Meghalaya a·dokode election-rang namen dingtanga ine anga pangnan aganronga. Meghalaya a·dokode manderang, party-na skangba an·tangtangni mande ma·sigipa ba namnikgipa ba ma·drangrangonikosa seokrongani gimin gipin a·dokrango gita ong·ja. Uni gimin angni Meghalaya a·dokni election-rango susae cheanirangko nikani gitade, manderang bang·batan party-ko niede dilgipako seoka ong·ja indiba an·tangtangni namnikgipa ba ma·sigipakosa seokronga,” ine NPP-ni national vice president parakataha.
Comments are closed.