SHILLONG: Re·baenggipa 2023 bilsini Assembly election-o Pynthorumkhrah constituency-oni an·tang baksa susaenggipa National People’s Party (NPP)-ni candidate Rocky Hek-ara uni gritang je·et ong·ja ine da·o Pynthorumkhrah-ni MLA ong·enggipa Alexander Laloo Hek a·kangatahaoba, uni iandake agananiko Rocky Hek jegalatskaaha.
Rocky Hek-ni parakatani gitade, uko gritang je·et ong·ja ine jegalengoba, ua AL Hek-ko ‘mamatang’ inen chanskakuenga.
“Hek nokdango maming ma·ekgrikani ba meligrikgijanirang dongja. Da·o ong·na sienggipa election-o anga susaengani giminsan chingni gisepo politics-ni gita meligrikgijani ong·enga. Angni mamagipa je kattarangko aganahachim, ua pilakan uni chanchianiko agananisan ong·aia,” ine BJP-ni MLA baksa susana sienggipa Rocky Hek, Bristibar salo parakataha.
Ia election-o susaaniara una altua ong·jawa maina ua changbongana MLA ong·enggipa aro MDC ong·enggipa PN Syiem baksasa susaenga ineba Rocky Hek parakataha.
“Indake ong·genchimoba anga manderangni chakpaaniko man·na gita rakbee kamrangko ka·gen aro anga ka·donga anga an·tangba ia constituency-onin ong·ani gimin manderang angko ra·chakgen aro angna chakpaaniko on·gen,” ine AL Hek-ni grigipa aganaha.
Pynthorumkhrah constituency-o bang·en namroro silroroani kamrangko nangengkua ineba Rocky parakataha.
Uni kosako bang·en matnanganirang donga ine ku·rachakengon, an·tangtangna kenchakna nangani ong·ahaosa manderang iandake sakgipinko matnangna namnikbata aro ua NPP-chi dilenggipa MDA sorkarini kamrangni a·sel namgniko man·na sienga ine Rocky Hek parakataha.