TURA: Raksamgre constituency-ni MLA aro MDC Benedic Marak-ni ning·o bang·en tangka paisarangko jakkalsretahani a·sel ia constituency-ni ning·o ka·gipa project-rangara ‘me·mang’ project-rangsan ong·aia ine Garoland State Movement Committee (GSMC) Pedaldoba regional unit parakatenba, ia project-rangni bidingo inquiry-ko dakatchina sorkario dabiangaha.
GSMC Pedaldoba regional unit-ni chairman Rimjen Sangma-ni parakatani gitade, Garo Hills Autonomous District Council (GHADC)-o Civil Works department-ni gita Raksamgre constituency-o ka·gipa dingtang dingtang kamrangni bidingo uamang RTI ka·e am·sandion, krorni kror tangkarangko koros ka·ani ja·manoba bang·en kamrangni matchotgijaniko nikna man·aha.
“2018-19 bilsina Grant Under Excluded Area-ni ning·o RCC dolong damgniko rikna gong kror 1-ko chamahachim aro ia gong krorsaoni lak 50-ko Katongre-o RCC dolongko rikna jakkalahaoba hanging foot bridge gitasa rikaiaha aro Napakgre songo RCC dolongko rikna gong lak 50-ko chamahaoba kamrangko ka·gija dontongaiaha,” ine Sangma parakataha.
2019-20(A) Grant Under Excluded Area-ni ning·o dam 31 ring well-rangko rikna gita gong 51,74,650 tangkarangko chamskaaha aro ming 10 gipin project-rangkoba jako ra·ahachim indiba ia jolrango da·onan ring well rikaniko nikna man·kujaenga ineba GSMC Pedaldoba regional unit-ni chairman parakataha.
Sangma-ni parakatani gitade, 2019-20(B) Grant Under Excluded Area-ni ning·oba Ganarugre Community Hall-ko rikna gita gong 19,40,000 tangkarangko chamatahachim indiba da·onan ia community hall-ko rikchipkujachim.
“Grant Under Excluded Area 2019-20(C)-ni ning·oba dingtang dingtang kamrangna gong 54,47,000-ko chame, ia tangkarangoni gong 19,40,000-kode Banglapara-oni Noyapara-ona bolni dolongko rikna gita chamahachim aro ia tangkarangko chu·gimik okahaoba maming kamrangko nikna man·jaha. Rabhagre-oba RCC dolongko rikna gita gong 30,07,000-ko chamatahachim indiba kamrangko da·onan a·bachengkujaenga,” ine GSMC Pedaldoba regional unit-ni chairman parakataha.
Indake ong·engon, 2020-21 bilsini Grant Under Finance Commission-ni ning·o dingtang dingtang kamrangna gong 70,81,000-ko chamatahachim aro ianoni gong 13,00,000-kode Daljong chiringko kabate Gondagre-oni Dabanggre-ona nangdimeatna gita RCC dolongna chamahachim indiba tangkarangko oke da·onan kamrangkode a·bachengkujaenga ine Sangma parakataha.
