TURA: Ja·manchake koborko man·soani gitade, re·anggipa Sonibar attamchibara a·dokni Chief Minister Conrad K Sangma-ko Guwahati airport-oniko Tura-ona escort ka·baenggipa ba dilbaenggipa police-rangni gari bolsa, district transport officer (DTO) saksani private gariko su·gakaha aro ia a·sel ong·anichi ia DTO aro uni jikgipa adita saknaanirangko man·na nangaha.
Ia a·sel ong·ani somoio a·dokni chief minister, Tura-o dolsa maharini tom·aona re·bae ja·mano Meghalaya High Court-ni chief justice baksa Ampati-ni District Sessions Court-ko nokdonggana re·angahachim.
Ua somoio South West Garo Hills a·jani DTO aro uni jikgipaba, song damsao anti cha·enba Tura-ona re·bapilskaengachim indiba Chasingre jolo donggipa NEHU Tura campus-ona sokon, chief minister-ko re·dilbaenggipa police garirangoni bolsa, uamangni gariko su·gakeaha aro uandaken uamang jiksesa, adita saknaanirangko man·na nangaha ine kobor on·aha.
Koborko on·ani gitade, ia a·selni bidingo a·sel ong·ao ga·akgipa nokdang, Robibar pringo police-rangna badi ka·eaha.
