TURA: Batanggimin bilsignina COVID-19 sajinmani somoio kamrangko dangdike on·gipa nurse-rang, technician-rang aro grade IV staff-rangna, uamangni man·na nanganirangko on·chipgija dongahaoba, December 14 tarik dipet dormaharangko on·na a·bachengataha ine Department of Health Services (DHS)-oni kobor on·ataha.
Koborko on·ani gitade, batanggimin bilsignina COVID-19-ko warachakanio mikkango donge kam ka·gipa grade IV employee-rang baksana cleaner, ward attendant, driver-rang aro gipinrangba, an·tangtangni man·na nangenggipa tangka paisarangko man·chipkujaengachim.
Indake ong·genchimoba, iani bidingo sing·sandiaton, COVID-19-ni kamrangko ka·gipa manderangna Budbar sal dipet dormaharangko on·na a·bachengataha ine DHS-oni parakataha.
Maini a·sel, indita somoirangna dormaharangko on·na man·jahachim, uani giminde DHS official-rang talataniko on·skajaha.
COVID-ni kamko ka·gipa mitam manderangni parakatani gitade, indita somoirangna dangdike on·ani ja·manoba uamangni man·gnirangko on·chipkujaengani a·sel kam ka·giparang bang·a neng·nikanirangko chagrongna nangtokengachim aro iani bidingo uamang a·dokni Chief Minister aro West Garo Hills a·jani Deputy Commissioner-naba badi ka·doangahachim.
Indake ong·engon, batanggimin bilsignina COVID-ni kamrangko ka·gipa manderangna Budbar sal dipet dormaharangko on·na a·bachengataha ine DHS-ni director Dr HC Lyndem, kobor ra·timgiparangna parakataha.