RESUBELPARA: North Garo Hills a·jao NPP aro AITC dolrangoniko man·chape komibeoba sak 130 membor-rang, Bharatiya Janata Party (BJP)-o napangaha.
Ia membor-rangko rimchaksona gita Budbar salo dingtangmancha jinma tom·bimonganiko Dainadubi jolo donggipa Chisim Apal songo ong·atangaha aro ia tom·anio Songsak-oni BJP-ni tikitchi susana sienggipa Thomas Marak, Mendipathar-oni susana sienggipa Digros D Shira, Kharkutta-oni susana sienggipa Lindoh Momin aro BJP-ni dingtang dingtang dilgiparangba bakko ra·angtokaha.
Ia tom·a matchotani ja·man Songsak constituency-o BJP-ni tikitchi susana sienggipa Thomas Marak, kobor ra·timgipa manderang baksa agangrikengon, manderang BJP dolni miksonganirangko ma·siengahani gimin ia changode BJP chegipa ong·ani cholrang dongenga ine parakataha.
“A·dokna aro a·dokni manderangna namroro silroroaniko ra·bana gitasa BJP kamko ka·enggipa dol ong·a ine manderang da·o ma·sitokengaha aro ia changode chinga a·dokni bang·bata constituency-rangon chegipa ong·gen. A·songni manderangna BJP-ni dilgiparang bang·en kamrangko ka·enga aro iako manderang da·o ma·sina a·bachengengaha,” ine Marak parakataha.
2018 bilsini Assembly election-o dingtang dingtang dolrang, BJP-ko Hindu party aro matchu cha·aniko champenggen ine tol·e sakki on·ahani a·selsa chu·sokgipa ong·jahachim ineba Marak parakataha.
“BJP dolde manderangni cha·a ringani bewalko dingtangagipa ong·ja indiba namroro silroroaniko ra·bagipa dolsa ine da·o manderang ma·sitokengahani gimin ia changode BJP, name dakna man·chongmotgen,” ine Marak aganaha.
NPP-chi dilenggipa MDA sorkariko matnangatengon, ia sorkarini giminde tangka paisa jakkalsretani giminsan manderang knasona man·tokenga ine Marak parakataha.
