SHILLONG: Meghalaya a·doko Chinese smart metre-rangko chatengani gimin NPP-chi dilenggipa MDA sorkariko AITC-ni national spokesperson Saket Gokhale matnangataha.
TMC-ni dilgipa Saket Gokhale-ni parakatani gitade, Meghalaya a·dokni nokrango gital chate on·enggipa smart electricity metre-rangara China a·songo tarigipa ostrorangsa ong·achim aro ian a·songna kenchakna nangani ong·engachim. China a·songo tarigipa ia smart metre-rango smart card-rang donga, jekon India a·songni pilak power network-rang baksa link ka·a ine Gokhale parakataha.
“Krorni kror tangka paisarangko jakkalsrete MDA sorkari, SIM card donggipa Chinese smart meter-rangko Meghalaya a·dokni nokdangrangna chate on·enga aro ian Meghalaya a·doknasan ong·aigija a·songnaba kenchakna nangani ong·enga,” ine TMC-ni national spokesperson parakataha.
China a·songo tarigipa smart metre-rangko jakkalanichi cyber-rang gita hack ka·e gipin a·songrango jakkalenggipa bijolirangko chipatani cholrang donga ineba Gokhale parakataha.
Iani bidingo Meghalaya a·dokni manderangna aganchakaniko on·china gita a·dokni gitcham power minister aro deputy chief minister Prestone Tynsong-ko dabiangengon, “China a·songo tarigipa bosturangko jakkalna India sorkarini dongimin niamrangko pe·e Meghalaya a·dokni manderangna aro a·songna kenchakna nanganiko ra·baengani gimin James Sangma aro Prestone Tynsong, talataniko on·na nangchongmota. Iandake MDA sorkarini tangka paisa jakkalsrete a·songna kenchakna nanganiko ra·baengani gimin chinga jrip nie dongna man·jawa,” ine Gokhale parakataha.