TURA: Tura-ni Dakkopgre-o rikenggipa PA Sangma Sports Complex-ni Football Stadium-ko da·al Sukrobar salni bako, a·dokni Chief Minister Conrad K Sangma, do·ga oe on·anggen.
Ia PA Sangma Sports Complex-ko 2006 bilsio, Tura-ni gitcham MP Purno A Sangma rike on·chengahachim aro a·bachengode ia stadium-ko MP Stadium ine biming donahachim.
Ia stadium-ko NPP-chi dilenggipa MDA sorkari, 2021 bilsini January ja dipet PA Sangma Sports Complex ine mingsreskaenba, gital dake rikna a·bachengataha aro ia Sports Complex-ni ning·o Football stadium baksana dal·dalgipa indoor hall ge·gni, swimming pool, badminton court-rang, Table Tennis hall, Squash court-rang, Cafeteria, office aro gipin kuturirangkoba rikenga.
Ia sports complex-ko 2021 bilsini January jaosa rikna a·bachengahaoba aro ua somoirango COVID sajinmani a·sel kamrangko dontongna nangahaoba Football Stadium-kode da·o matchotaha aro uandaken ia Football Stadium-ko da·al salni bako sorkari, do·ga oe on·angna siengaha ine u·iataha.
Ia chu·gimik sports complex-ko rikna gita gong kror 127.7 tangkarangko chamaha aro chu·gimik sports complex-kode 2023 bilsini bon·angachibara nokdonggae on·angskagen ineba official-rang u·iataha.
Ia PA Sangma Sports Complex-ni Football Stadium-ko nokdonggae on·anganio dingtangmancha Meghalaya state team aro North East United Football Club-ni watatenggipa dol baksa exhibition football match ba robol kal·susaaniba donggen aro unbaksana drone show aro fireworks-rangba donggen ine official-rang u·iataha.
Indake ong·engon, ia PA Sangma Sports Complex-ko rika matchotgijan Football Stadium-ko a·dokni Chief Minister Conrad Sangma, an·tangni man·gnina nokdonggae on·enga ine Tura-ni BJP MDC Bernard N Marak matnangatskaaha.
“A·dokni chief minister matchotgijagipa kamko politics-ni gita an·tangni man·gninasa nokdonggae on·na sikkelenga. Chingni da·alo ia stadium-ko re·ange nieani gitade bang·a kamrangan matchotgija dongkuenga aro ian manderangna kenchakna nangani ong·enga,” ine Marak parakataha.
PA Sangma Sports Complex-ni Football Stadium-ko da·al do·ga oe on·anggen
Date:
Share post:
