SHILLONG: Re·baenggipa 2023 bilsini Assembly election-na Trinamool Congress (TMC)-ni candidate-rangko da·o Krismasna skangan parakatnaba gnang.
Meghalaya TMC-ni president Charles Pyngrope-ni kobor ra·timgipa manderangna parakatani gitade, candidate-rangko sandiani kamrang matchotangengahani gimin Assembly election-o susana sienggipa chu·gimik candidate-rangko uamang ta·raken parakatna miksongenga.
“Chinga man·a dipet ta·raken chu·gimik candidate-rangni bimingko parakatgen. Candidate-rangni bimingko parakanian da·o chingni mongsonggipa kam ong·engani gimin chinga chu·gimik candidate-rangko man·kujaoba bang·bata candidate-ni bimingrangkon parakatgnok,” ine Pyngrope aganaha.
January jani skanggipa antion Election-na Model Code of Conduct-ko ra·gatani cholrang dongengani gimin Krismasna skangan uamang candidate-rangni bimingko parakna nangnikenga ineba TMC-ni state president parakataha.
“January jani skanggipa antion MCC-ko ra·gatani cholrang donga ine chingna u·iatmanahani gimin chinga candidate-rangni bimingko ta·raken parakna nangnikenga aro apsan daken gipin political dolrangba iako ja·rikna nanggen,” ine Pyngrope aganaha.
Assembly election-o TMC-na dongenggipa cholrangni gimin janapatskaengon, batanggimin jadokni gisepo aro mongsongbate national general secretary Abhishek Banerjee-ni a·dokona re·baani ja·man TMC bilakbatna a·bachengaha aro da·o TMC-ni national president Mamata Banerjee-ni re·baani ja·man TMC-ko aro bilakbatataha ine Pyngrope parakataha.
MLA-rangni TMC-o napani gimin janapatskaengon, “Na·simang MLA, MDC ba party worker ong·genchimoba, chingni do·gako na·simangna pangnan oe donenga,” ine TMC-ni state president parakataha.