SHILLONG: Sukrobar salo, Meghalaya a·dokni Director General of Police (DGP) Dr LR Bishnoi, Assam aro Meghalaya a·dokni simao donggipa Umsaw Lumdorbar songona re·angenba, Assam a·dokni District administration, Forest aro Police department-ni official-rang baksa tom·e chanchirimangaha.
Umsaw Lumdorbar songo Assam Forest department-ni fencing kaaniko jegalenba songni manderang, re·anggipa Bristibar salo, Ri Bhoi a·jani Deputy Commissioner-na memorandum-ko on·angahachim.
Ia jolrangara Meghalaya a·dok ning·o ga·akgipa biaprangsa ong·a ine songni manderang a·kangenba, ia songo Assam Forest department-ni fencing kaaniko dontongatna gita ta·raken ja·kuko de·china gitaba songni manderang dabitokahachim.
Indake ong·engon, iandake songo donggipa manderangni badi ka·aniko man·ahani gimin Sukrobar salo a·dokni DGP, Umsaw Lumdorbar songona re·angenba Assam-ni official-rang baksa agangrikeaha.
