SHILLONG: Congress doloniko ra·gala man·gipa MLA sakgni, chong·motan Ampareen Lyngdoh aro Mohendro Rapsang, an·tangtangni kamko watna gita Sombar salo, kam watani chittiko Assembly Secretariat-ni Commissioner & Secretary Andrew Simons-na on·eaha.
2018 bilsini Assembly election-o Ampareen Lyngdoh, East Shillong constituency-oni Congress tikitchi susae seokako man·ahachim aro Mohendro Rapsang-ba West Shillong-oni Congress tikitchi susae seokako man·ahachim.
Ia MLA sakgnian, Congress doloni ra·galako man·ahani gimin re·baenggipa 2023 bilsini Assembly election-o susana gita NPP-o napskana siengachim.
Congress doloni ra·galako man·ani ja·man ia MLA sakgnian gipin political dolo napna skangba, an·tangtangni manderang aro constituency-tangtangni manderang baksa, batanggimin jarangonin agangrikengahachim.
Indake ong·engon, an·tangni kam wataniko Ampareen Lyngdoh, AICC-ni president Mallikarjun Kharge-naba email gita watataha.
