SHILLONG: Ia bilsio pilakon tang·ona aro tang·doa dakani ja·mano skotong songjinmao Christmas manianirang ga·sutaiengaha, Christmas ong·na bang·gija salrangsan dongaiaha aro uandake Shillong-oba bijolirangchi nitoatenga aro a·doko manianiko manina gipin nitoatani aro tarisoanirangko tarie ga·suatenga.
Shillong-o, bang·a giljarang, dokkanrang aro rama-sorokrangko tarie nitoataha aro songjinmani jeba biapona re·angbo songjinmao maniani gisik ong·aniko parakengako nikenga.
Shillong-ni ge·gni dal·dalgipa bajarrang-Police Bazar aro Iewduh ba bajar bajar-oba manderangni sikpekpek Krismasna bajar koros ka·anirangko nikenga.
Dingtang dingtang dokkanrangoba mande bang·anirangko nikenga. A·jolo badinggipa saksani aganani gita uamangni badingchiwalani ia bilsio nambatenga indake re·baenga sal 3-4-o nambatna ka·dongsoenga ine ua aganaha.
Uamangni dokkanoni manderang bang·en ong·katenga, songjinmao dingtangmancha IGP-oni Motphran-ona gari sikket-changket re·na man·gija jadonggae donganirangkoba nikenga.
Bajar a·jolrang baksana dingtang dingtang giljarangoba manianirangkoba nikenga.
Ia bilsio sorkari nitoataniko dakode aro Khyndailad-o nambate tariode songjinmao dingtang dingtang biaprango Krismas-ko skangsoe maniani gita dal·a carol-rangko ong·ata dongja.
A·dokgipinoni bang·a tourist-rang ia maniani somaio Shillong-ona sokbaana a·bachenga.
Tourist-rangni re·baani bang·a indiba ru·utgija salo golmal ong·anichi hotel-rangko a·kanga dongkujaenga ine hotel dakgipa saksa aganaha.
Maibakai Krismas-na skang bang·bate sokbana ka·dongenga.
Shillongo, Krismas-na bijoli aro gipin nitoatanirangchi nitoatenga
Date:
Share post:
