SHILLONG: FOCUS aro FOCUS+ program-ni ning·o gamna ge·na man·gijagipa biaprangoba mitam minister-rang aro MLA-rang, manderangna tangka paisarangko suale, ia scheme-ko jakkalsretaha National People’s Party (NPP)-chi dilenggipa Meghalaya Democratic Alliance (MDA) sorkario bak ong·paenggipa United Democratic Party (UDP), Chief Election Commissioner (CEC)-na badi ka·doangaha.
Iani bidingo CEC-na badi ka·doangengon, ia scheme-ara songo noko game ge·e cha·enggipa manderangni namgnina ra·gatgipa scheme-sa ong·e game ge·e cha·na man·gijagipa biaprangode manderangna ia scheme-ni tangka paisarangko suale on·na man·ja ine UDP-ni dilgiparang, mikkangchi ia scheme-ko jakkalsretna man·jana gita ja·kurangko de·china CEC-ko didiataha.
Chief Minister-ni FOCUS aro FOCUS+ program-rangara, COVID-19 sajinmani a·sel tangka paisani gita neng·nikanirangko chagrongna nangenggipa game ge·e cha·giparangna ra·gatgipa gong kror 200-ni program ong·achim ine nikna man·a.
Ia program-ni namgnirangko ra·na gita game ge·e cha·gipa manderangko producer group dake sualenba, ia producer group dolpraknan gong 5000/- ka·e tangkarangko suale on·engachim.
Indake ong·engon, mitam minister-rang aro MLA-rang, ia program-ni tangkarangko jillarango, jeon gama ge·ani biaprang dongjachim, uandakgipa biaprangoba manderangna suale on·skaenga ine UDP badi ka·doangaha.