SHILLONG: East India Company jekai Meghalaya a·dokona a·dokni tom·tomani aro ku·cholsan ong·e janggi tanganiko golmal ka·na re·baahachim, apsan daken Trinamool Congress (TMC) dolba a·doko tom·tomaniko golmal ka·e West Bengal a·dok gita so·sojengjeng ong·atnasa re·baaha ine Bristibar salo, Meghalaya a·dokni Bharatiya Janata Party (BJP) parakataha.
TMC dol a·dokni manderangna tol·e ku·mikchetanirangko on·enga ine matnangatengon, TMC-ni tangka paisa jakkalsretani, ‘gunda’ dake mesokani, dinggrikani baksa politics kal·ani aro uandakgipa namgija kamrangko ra·bana gitasa Meghalaya a·dokona re·baaha ine BJP-ni ku·wattimgipa M Kharkrang parakataha.
“East India Company, Meghalaya a·dokona a·dokni tom·tomaniko nisigalna gitasa re·baahachim aro da·o apsan daken TMC dolba, a·doko so·sojengjeng ong·aniko ra·bana aro West Bengal a·doko gita dakgrik dinggrikaniko ra·banasa re·baaha,” ine Kharkrang parakataha.
TMC dolara West Bengal a·dokni party-sa ong·a aro ia dolni dilgiparang, Meghalaya a·dokni gimin aro a·doko songdongenggipa manderangni gimin mamingkon ma·sigiparang ong·ja ineba BJP-ni spokesperson parakataha.
Kharkrang-ni parakatani gitade, Meghalaya a·dokko a·doktangni degiparangchin chalaigen ine TMC aganengoba, uamang Meghalaya a·doko West Bengal sorkarini nangnika gitasa chalaigenchim.
Adita salrangna skang a·bachengatgipa ‘We Card’-ni miksonganiko sing·doatengon, ia scheme-ara West Bengal a·doko ‘Lakshmir Bhandar’-ni biming ra·gatgipa scheme-an ong·a aro West Bengal a·doko ia scheme-na manderangko seokanio mikkang niteanirang donga ine Meghalaya BJP-ni ku·wattimgipa parakataha.
West Bengal a·doko namroro silroroani tangka paisarangko aro dingtang dingtang cholrangko cha·e katani ja·man da·o TMC dol, Meghalaya a·dokoba manderangni man·gnirangko ra·e katna miksongenga ineba Kharkrang parakataha.
TMC dolmangmangsan BJP-ni kosako chakatenggipa dol ong·a ine Abhishek Banerjee-ni agangipa kattarangni gimin janapatskaengon, BJP dolde, Meghalaya a·dokni manderangna chadenggipa dolsa ong·skaa ine Kharkrang parakataha.
