SHILLONG: Meghalaya a·doko sorkariko rikna man·genchimode da·o mikkang bilsi bongani gisepo a·dokna namroro silroroaniko boksis dake a·dokni manderangna on·gen ine Krismasni attamo Meghalaya a·dokni Bharatiya Janata Party (BJP) ku·rachakaniko on·angaha.
Batanggimin bilsi 50-ni gisepo a·doko namroro silroroaniko man·ana bate da·o bilsi bongani gisepon uamang a·dokna namroro silroroaniko ra·bae on·gen ineba a·dokni BJP ku·rachakaniko on·ataha.
“An·ching ru·utbea somoirangna dabiahani giminsa Assam a·dokoniko bake Meghalaya a·dokko on·aha aro an·ching an·tangtangni identity-ko chel·chakna gitasa dingtang a·dokko nangnikaha. Dingtang a·dokko man·anio an·ching an·chingni chu·sokgipa ong·ani itihasko sena cholko man·ahachim indiba da·o bilsi 50 batangahaoba ia chu·sokaniko sena man·kujaenga. Uni gimin da·o mikkang bilsi bongani gisepo chinga a·dokna namroro silroroaniko ra·bana gita ia Krismasni attamo a·dokni manderangna ku·rachakaniko on·enga,” ine Meghalaya BJP-ni state president Ernest Mawrie parakataha.
Mawrie-ni parakatani gitade, election-na skang BJP dol, sal 100-ni priority ba mongsonggipa dakna nangani program-ko tarienga aro ian sorkariko rikaoni sal 100-ni gisepo chu·sokatna miksongenggipa kamrang ong·enga.
Batanggimin bilsi 50-na a·dokni manderang, namroro silroroaniko nikna ka·oksienba, dingtang dingtang sorkarirango ka·donge seokahachim indiba ia sorkarirang, manderangko togiana agrede maming kamrangkon chu·sokatna man·jaha ineba Mawrie parakataha.
“Indita bilsirangna togiako man·e a·dokni manderang da·ode skangona bate namen seng·bataha aro election-ni somoirango maikai dingtang dingtang dilgiparang, tol·e ku·rachakanirangko dakronga da·o uamang ma·siaha. A·dokni manderang, BJP-ni kamrangkoba nikmanaha maina ma·mongo BJP sorkari, a·songni pilak a·dokrangnan maming mikkang niteani gri namroro silroroaniko ra·bae on·aha. An·chingni songsul Assam a·dokoba BJP sorkariko chalaiengani gimin pilakni gitan tang·doaniko nikna man·engaha, uni gimin da·o manderang, a·songni Prime Minister Narendra Modi aro BJP-o ka·dongna a·bachengaha,” ine Meghalaya BJP-ni state president parakataha.
Batanggimin bilsi bongani gisepo Meghalaya a·doko namroro silroroaniko nikna man·enggipa pilak kamrangan ma·mongo BJP sorkarini ra·gatgipa scheme-rangni giminsan ong·aia ineba Mawrie parakataha.
“Meghalaya a·doko indita bilsirangna tangka paisarangko jakkalsretahani gimin a·dokni manderang namen ka·a ding·chaotokaha maina iandake tangka paisarangko jakkalsretengani a·selan a·doko maming namroro silroroani dongjaenga ine manderang ma·sitokaha,” ine Mawrie parakataha.
BJP-ara tangka jakkalsretgipa dol ong·jani giminsa gipin political dolrang, BJP-ko matnangna chol dongjae, jat aro torom basegipa political dol ine matnangskaaha ineba BJP-ni state president parakataha.
Bon·kamao ua Meghalaya a·doko songdongenggipa manderangna Krismasni namgipa skanikoba parakataha.