ILP-ni bidingo NPP, gipin party-rang baksa melie kam ka·gen: Ampareen

SHILLONG: 2024 bilsio Lok Sabha election-rang ong·kujana kingking Inner Line Permit (ILP)-ko ra·gatchina dabiani seat-ona ra·pilangani ong·na nangaigen ine East Shillong MLA gitcham, Ampareen Lyngdoh aganaha.
Jekon Ma·mong chan-china nangnikenga bang·a kamrang dongaonin 2024 Lok Sabha election-rangna skang ILP-ko parakatani gimin a·dok ka·dongna nangja, Lyngdoh aganaha.
“ILP 2024 ong·kujana kingking ki·sangon dongaikugen a·song election ong·ani ja·mano parliament ong·piltaiaode ong·aigen,” ua aganaha.
ILP mamlani bidingo ua NPP aro gipin party-rang baksa melie kamko ka·gen ine mabakai krimgen gitcham East Shillong ka·dongataha.
Eastern Bengal Frontier Regulation, 1873-ni gita ILP-ko ra·gatani bidingo Ma·mongko didina 2019-o ra·gatgipa resolution-o sak 60 MLA-rang gimikan soi ka·aha a·dokni songpang-giparang uko gualna gita man·jawa ine Lyngdoh janaptaiaha.
“An·ching mangrakgipa sorkari ong·ode ILP gita mamlarangni bidingo an·tangtangni chanchiako jedakeba ra·angna man·gen. NPP aro uamangni bakrimgipa dolrang Meghalaya Residents Safety aro Security Act-ko chalaina chanchienga jekon tik ramao ja·ku de·enga anga chanchia,’’ ua agandapaha.
Maiko dondipenga uan ILP ong·a je Act-kon Parliament-chi jetjetako man·enga ia a·doktangni Act-ko bilakbatatna bakrimna nanggen, ua aganaha.
“Manderangna uko ong·atna aro ong·telaiao pro-tourism-ko dakna MRSSA-o tik ka·anirangko dakaha. ILP-ni dingtang dingtang model donga. Maina Meghalaya a·dok India sorkarina cholko on·a man·jaenga a·selrang donga,’’ ua agandapaha.
Indake ong·engon, NPP ru·uta bilsirangna galchipgipa a·dok ning·ni sima-ariko namatna man·gen ine East MLA gitcham janapaha.
“A·dokni ning·ni sima-ari mamlako NPP uamangni dilgipachi chalaina gita man·enga. Party a·dok ning·ni sima-arini bidingo raken krengengaha,” Lyngdoh aganaha.
Skanggipa gadangko matchotataha, gnigipa gadangkoba namatna nanggen aro uan skanggipa gadango gitan manderangni namnikao pangchakgen ine ua aganaha.
Khasi aro Garo ku·sikrangko Indian Constitution-ni Eight Scheduled-o chapatna dabigipani giminba aganao Meghalaya a·dokni dabiako knachakchina  nangchongmotgipa lekkarangko India sorkarina watatmanaha ine  East Shillong MLA gitcham aganaha.
“Ia  kam ka·anirango dona chinga namgipa cholko man·a gita uarang baksa jemangan melia memborrangni dongpaan baksa nangrimbatna da·o anga ka·dongsoenga,’’ ua aganaha.
NPP aro UDP gipin chonchongipa bakrimgipa dolrang baksa dal·dalgipa bakrimgiparang ong·a Khasi aro Garo ia minggni official ku·sikrangko chanchiani bak dakna hukum man·gen aro 2023 bilsi ja·mano Meghalaya Legislative Assembly-ni kamrang gita kamko ka·na man·gen namgipa ja·kurangko de·enga, Lyngdoh aganaha.
Ia mamlako atamangni gitade parakaha.
HNLC baksa tom·tomanina agangrikani bidingo aganao ta·raken resolution-ko ra·bana nangengani aro da·o uamangni nama kam-bewalo matchotatana tom·tomanina agangrikanirangko dakna biapo namgipa miksonganiko dakna nangengani gimin ua de·e me·sokaha.
“An·chingni ki·sango iako an·ching nikna gita man·gen. Pilak gipin bobil dake chakatgipa dolrang nama ramaona an·pilbaaha. Anga aro Rapsang gita dakgipa manderang iako NPP-ni mikkangona ra·baaha,’’   gitcham East Shillong MLA aganaha.
A·doko niam aro retini obostani bidingo pilak bakrimgipa dolrang daitoko jako ra·na nanga ua agandapaha.
“NPP-o nape u·i-ma·sianirangko man·e chinga home, revenue department-rangko aro gipin mongsonggipa department-rangko a·gipirangni aro u·i-ma·sigipa manderangni nirokani ning·o donenga. Police dolkoba dakchakaniko nangchongmotaniko chinga nangnikenga. Re·baenga bilsirango raken chadengna ian sorkariko dakchakgen,” East Shillong MLA gitcham agandapaha.