TURA: Ia bilsio Meghalaya a·dokni bilsi 50 gapaniko maniengoba Garo Hills-ni bang·bata biaprangon rama jal·langrang namjae, pilakni gitan ja·manchakatako man·na nangkuenga.
Garo Hills-ni rama jal·langrangko tarina gita krorni kror tangka paisarangko chame on·engoba bang·bata rama jal·langrangan nambatatako man·ani pal batesa namroroangjaenga aro ia rama jal·langrangoni namjabatgipa ramarangara South Garo Hills, North Garo Hills aro West Garo Hills a·jarangon ong·enga.
South Garo Hills a·jani rama jal·langrangko niatgenchimode skanggipa NH-62 ramani obostakon nikatchengna gita man·a maina ia ramako tarina a·bachengatahaoba ia ramani bang·bata bakrangon obosta namjae manderang re·ruraanirango neng·nikanirangko chagrongna nangtokengachim. Uni ja·man Chokpot, Rongara aro Siju ramarangko niatgenchimoba ia ramarangara skango jekai ong·achim, da·oba apsan daken ong·engako nikna man·kuengachim.
Koborko on·ani gitade, Chokpot-oni NH-51 ramaona dakbagipa ramako tarina gita contract-rangko on·ahachim indiba da·alonan ia ramako re·ruraenggipa manderang rang·speaniko man·kujaenga. Chokpot-oni Gasuapara-ona dakanggipa ramaba km 30-mangsan ong·aiachim indiba ia ramani obosta namsrangjahani a·sel ia ramako re·ruraanio baditaba kontarangko nangskaenga ine jolni manderang u·iataha.
North Garo Hills a·jani rama jal·langrangko niatskagenchimode Damra-oni Bajengdoba-ona dakanggipa aro Adokgre-oni Mangsang-ona dakanggipa ramarangko tarianirang ka·sindugaengani a·selan jolo songdongenggipa manderang aro ia ramako re·ruraenggipa manderang neng·nikanirangko chagrongna nangtokskakuengachim.
Damra-oni Bajengdoba-ona dakbagipa ramako tarina Badri Rai & Company (BRC) contract-ko man·ahachim aro ia ramako 2019 bilsion tarina a·bachengatahaoba da·alonan kamrang matchotgija donengako nikna man·tokskakuenga.
Adokgre-Mangsang-Rongjeng ramakoba tarina gita 2017 bilsion gitcham sorkari sanction ka·angahachim indiba da·alonan ia ramako matchotchipgija dongengako nikna man·skakuenga.
Apsan daken North Garo Hills a·jao Mendipathar-oni East Garo Hills a·jao Songsak-ona dakbagipa ramaba obosta namsrangjae manderang neng·nikannirangko chagrongna nangtokenga ine kobor on·aha.
West Garo Hills a·jani rama jal·langrangko niatskagenchimode, Dalu-oni Tura-ona dakbagipa NH-51 ramako tariani da·alonan matchotkujaengani a·sel jolo songdongenggipa manderang aro ia ramako re·ruraenggipa manderang neng·nikanirangko chagrongna nangtokkuenga ine kobor on·aha. Ia ramako 2018 bilsion NHIDCL-ni ning·o tarina a·bachengahachim indiba da·o bilsi bonga ong·pilengahaoba ia km 48 ong·gipa ramani 50 percent-mangni gitade matchotkujaenga ine kobor on·timgiparang parakataha.
West Garo Hills a·jao Agia-Medhipara-Phulbari-Tura (AMPT) ramaba mongsongbatgipa ramarangoni dilsa ong·achim indiba ia ramani obosta namsrangjani a·sel ia rama gita re·ruraenggipa manderang neng·nikanirangko chagrongna nangtokengachim.
Iani ja·man, West Garo Hills a·jao Rongram-oni Phulbari-ona dakanggipa ramaba mongsonggipa ramarangoni dilsa ong·engachim aro ia ramakoba 2021 bilsini a·bachengachibara tarina gita sorkari tangka paisarangko chame on·ahachim. Ia ramako tarina gita krorni kror tangka paisarangko chamatani ja·manoba aro ia ramako tarina contract-ko man·gipa manderang krorni kror tangkarangko okmanahaoba ia ramao maming namdapanirangko nikna man·kujaenga ine kobor on·timgiparang parakataha.