TURA: Assam a·doko Kristian mondolirangni jelbra jelsuani bidingo Assam sorkarini am·sandina ge·etani gimin Trinamool Congress (TMC) sing·doatenba, Kristianrangni tom·tome olakkianiko Bharatiya Janata Party (BJP) golmal ka·na jotton ka·enga ine matnangataha.
Budbar salo, Tura-o donggipa BJP West Garo Hills District-ni office-o kobor ra·timgipa manderang baksa agangrikengmiting somoio iako All India Trinamool Congress (AITC) Meghalaya-ni vice president aro Rangsakona-ni MLA Zenith Sangma parakataha.
“Dingtang dingtang gilja nokrango Kristianrangni tom·tome olakkianiko BJP golmal ka·na jotton ka·enga. Assam a·doko BJP sorkarini iandake sason ka·na jotton ka·aniko chinga raken jegalenga. Gilja nokrangko aro Kristian dilgiparangko iandake chadrapanikoba chinga raken jegalenga maina BJP-chi sason ka·enggipa bang·bata a·dokrangon uamang Kristianrangko dokkol ka·na jotton ka·enga,” ine Sangma parakataha.
BJP dolni iandake cha·chippile kam ka·aniko TMC nikgija dake dongna man·jawa ine janapatengon, “Chinga janggi gnanggiparang ong·e iandakgipa a·selrangko jrip nie dongna man·jawa. Uni gimin chinga bon·kamaonan warachakangkugen aro BJP dolni iandake a·songko bak dakna jotton ka·aniko ong·na on·jawa,” ine AITC Meghalaya-ni vice president parakataha.
Kristian toromni kosako BJP sorkarini dokkol ka·na jotton ka·aniko jegalatengon, “BJP-chi sason ka·enggipa a·dok ge·antion gilja nokrangko kragija dake chadrapanirangko an·ching nikna man·enga. Salgro salaram a·dokrangode iandake Kristianrangni kosako chadrapanirangko an·ching knana man·kujachim indiba Assam-o BJP sorkariko rikani ja·man da·o salgro salaram a·dokrangoba an·ching Kristianrangni kosako dokkol ka·aniko nikna a·bachengengaha. Adita salrangna skangsan Maharashtra aro Karnataka a·dokrangoba gilja nokrangko chadrapaniko aro mondolini dilgiparangko kragija dake chadrapanirangko nikna man·aha aro ian BJP dolni Kristianrangni kosako dokkol ka·aniko mesokani ong·enga,” ine Sangma parakataha.