SHILLONG: Meghalaya Democratic Alliance (MDA) sorkarini bak ong·e nama kamrangna rasong chaenga ong·ode matnanganirangko man·enggipa kamrangnaba apsan daken daiko ra·na nanga ine Budbar salo MDA sorkariko dilenggipa National People’s Party (NPP)-ni gital ku·wattimgipa Ampareen Lyngdoh, MDA sorkario bak ong·enggipa United Democratic Party (UDP)-ko didiataha.
“Ia matnanganirangna angni UDP-ko sing·na skanide, sorkarini ia kamna maini gimin na·simang dolsaosan pakwatna sikenga? Sorkarini namgipa kamrangna na·simangba mittelaniko man·na kraa ine aganenga ong·ode sorkarini namgijagipa kamrangnaba na·simang apsan daken daiko ra·gipa ong·na nanga,” ine Lyngdoh parakataha.
Nama aro namgijanide pangnan apsan re·chaprongaia ine janapatengon, MDA-o bakrimgimin dolrang ong·genchimoba, namgipa kamrangnade UDP mittelpilaniko man·na sikenga indiba namgijagipa kamrangnade uamang an·tangtangko chel·ate dongna jotton ka·skaenga ine Lyngdoh parakataha.
“An·ching pilakan MDA-o bakrimgipa dolrang ong·e pilak kamrangkon nangrimesa ja·ku de·aha ine an·ching ma·sina nanga. Ia sorkarini chu·sokatgipa kamrangna chief minister-ni noksakon nikaiani giminde darangba darangko jegalna man·ja,” ine NPP-ni ku·wattimgipa parakataha.
Ia chang election-o dolsa dolgipinni gisepo matnanggrikanikode nikna man·aigen aro ian ong·rongbewalsa ong·aia ineba Lyngdoh aganaha.
“Namgipa kamrangna mande saksako mittelpilaniara ong·ronggipa bewalan ong·a aro a·songni gipin bakrangoba iandake nangrime rikenggipa sorkarirango nikna man·aigen,” ine Lyngdoh parakataha.
Sorkarini chu·sokatgipa program-rangko NPP dolsa a·kanggope ra·enga ine adita salrangna skangsan UDP-ni working president Paul Lyngdoh matnangahachim ine nikna man·a.
