SHILLONG: Re·baenggipa 2023 bilsini Assembly election-na skang, dilgiparang dingtang dingtang dolrangona katjojotokengon, Bristibar salo MeECL-ni gitcham superintendent engineer Allan K Suchiang-ba an·tangna kam ka·enggipa manderang baksa Bharatiya Janata Party (BJP)-o napangaha.
Suchiang-ko rimchaksona tom·aniko ong·atanio BJP-ni state president Ernest Mawrie, Cabinet Minister Sanbor Shullai, BJP-ni state executive membor aro West Jaintia Hills-ni in-charge Gagan Jain aro gipin dilgiparangba dongpae bak ra·angtokaha.
MeECL-ni gitcham engineer-ko rimchaksoanio BJP Meghalaya-ni state president Ernest Mawrie, jinmana aganprakatengon, BJP dolara a·gilsako dal·batsranggipa political dol ong·a ine parakatenba, gital membor-rangko ia ‘dal·batsranggipa dolona’ rimchaksoangaha.
BJP-ni enrolment drive-ko a·dok gimikon ong·atengani gimin ia enrolment drive-ko chu·sokgipa ong·atchina gitaba ua BJP dolna kam ka·enggipa aro membor sakantikon didiangaha.
Meghalaya a·doko u·i-ma·sigipa manderang aro skia man·gipa manderang BJP-o naptokenga ine an·tangni kusi ong·aniko parakatengon, ia manderangni BJP-o napanichi BJP-ni scheme aro program-rangko nambate chu·sokgipa ong·atna man·gen ine Mawrie parakataha.
BJP-o napangani somoio MeECL-ni gitcham superintendent engineer Allan Suchiang-ba jinmana aganprakengon, BJP dolara pangnan namroro silroroanina kamko ka·gipa dolsa ong·ani gimin ua pangnan BJP-na chakpagipa aro kamko ka·na sikgipa mande ong·achim ine parakataha.
