SHILLONG: Meghalaya a·doko bang·bata jolni political dolrangan sichipna gita dake dongtokengani gimin ia 2023 bilsini Assembly election-ara ia political dolrangna dake niani gita ong·gen.
Meghalaya a·doko United Democratic Party (UDP)-na agrede bang·bata jolni political dolrangan onbatgipa gadango bilakgiparang ong·jani gimin doltangtangko chalaianio neng·nikanirangko man·tokna nangengachim.
Hill State People’s Democratic Party (HSPDP)-ba uamangni dilgipa Hopingstone Lyngdoh-ni tangkuengmiting somoirangode West Khasi Hills, South West Khasi Hills aro gital bikotgipa Eastern West Khasi Hills a·jani mitam constituency-rangode bilakkuengachim indiba 2018 bilsio uamang, South West Khasi Hills a·jani Mawkyrwat constituency-mangmangosan chegipa ong·aiahani gimin da·o ia dol, uamangni bilakgipa constituency-rangoba gimaroroangengaha. Iana agre, 2018 bilsio HSPDP, East Khasi Hills a·jani Sohiong constituency-osan cherikna man·aiahachim.
2018 bilsio chegipa HSPDP-ni MLA sakgni, chong·motan Mawkyrwat-ni MLA Renikton L Tongkhar aro Sohiong-ni MLA Samlin Malngiang sakgnian da·o 2023 bilsini Assembly election-na skang gipin dolrango napskana siengahachim.
Indake ong·engon, joltangni political dolsa People’s Democratic Front (PDF) dolba 2018 bilsini Assembly election-o seat dambriko cheahachim indiba da·o uamangni MLA sakgniba gipin dolrango napangskana siengahani gimin ia election-ara PDF dolnaba dake niani gita ong·gnok.
