Khasirangni gandingko ‘chonnikanina’ jegale HITO re·jomaniko ong·ata

SHILLONG: A·songni Prime Minister Narendra Modi-ni Shillong-ona re·baani somoio una ganatgipa Khasi jatni ganding chindingni gimin Trinamool Congress (TMC)-ni dilgipa aro gitcham cricketer Kirti Azad-ni social media-o chonnika gnang janapataniko jegale Sukrobar salo, Hynniewtrep Integrated Territorial Organisation (HITO)-ni gita Shillong songjinmao tom·tome re·jomaniko ong·atangaha.
Jinma re·jomaniko ong·atna skang, jinma tom·bimonganiko Motphran-o donggipa Jaiaw taxi stand-o ong·atangchengaha aro ia tom·anio HITO-ni dilgiparang, ia tom·aniko ong·atani bidingo jinmana agan-talate on·angaha.
Ia jinma re·jomaniko Motphran-oni a·bachengataha aro uandaken police-rang, GS Road aro Khyndailad-chipakna jinma re·jomaniko champengatskaaha.
Ia re·jomaniko Motphran-oni a·bachengate GS Road gita re·jomangenba State Central Library-o matchotatna tik ka·soahachim indiba ia somoirango manderang koros ka·chichaengmiting ong·ani gimin GS Road gita re·jomgija dingtang rama gita re·jomskagen ine ia tom·anio HITO-ni president Donbok Dkhar parakataha.
Khasi jatni mikkim rasongko ra·dona aro jatni ganding chindingko chonnikahani gimin jegale ia tom·tome re·jomaniko ong·atenga ineba ua parakataha.
Ia salara U Who Kiang Nangbah-ni chang 160-gipa siani salko manianiba ong·engani gimin ia salko gisik ra·e manijola gita ia re·jomaniko ong·ataha ineba HITO-ni president parakataha.
Jinma re·jomaniko Motphran-oni a·bachengatani ja·man, Them Bijoy-ona re·ange, Lum Survey, Rhino Point aro Civil Hospital junction gita re·jomangskae, State Central Library-o matchotateaha.
Civil Hospital-ona sokangon HITO-ni dilgiparang, re·jomaniko dikdiksa dondikate, Kiang Nangbah-ni mangkrong-o una dingtangmancha mande ra·pilskaanikoba dakangaha.
Kirti Azad-ni kosako niamo pangchake ja·kuko de·china gita HITO, Sadar Police Station-o FIR ka·doangahachim ine nikna man·a.