SHILLONG: British-rangni sasoniko jakgitelatna krengdilanggipa manderangoni saksa U Kiang Nangbah-ni chang 160-gipa siani salko Sukrobar salo, a·dokni dingtang dingtang biaprango gisik ra·e maniangtokaha.
Shillong-o ia salko Khasi Students Union (KSU)-ni gita manidilangenba, uni British-rangni sasoniko jakgitel ong·atna ka·dongbee warachakahanina uko gisik ra·e, una dingtangmancha pul bibalrangchi mande ra·pilskaaniko dakangaha.
Ia salko gisik ra·e manianio KSU-ni gitcham dilgipa aro UDP-ni dilgipa Paul Lyngdoh-ba dongpae bakko ra·angengon, skang salrango biltangna tonual aro danilrangko ra·e warachakgenchimoba ia sal somoirangode manderang sea-jotanirangchisa warachakskaengaha ine jinmana agan-talataniko on·angaha.
Ia salko manianio KSU-ni president Lambokstar Marngar-ba dongpae jinmana aganprakangengon, manderangko chel·chakna aro an·tangtangni bilnade pangnan kakketo chadengna nanga ine chadamberangna agan-ku·pattianirangko on·angaha.
Mongsonggipa tom·aniko Jaiaw Crematorium-o ong·atangskaaha aro ia tom·anio Khun Hynniewtrep National Awakening Movement (KHNAM) dolni gitcham MLA Adelbert Nongrum, mongsonggipa sokgipa ong·e bakko ra·angaha. U Kiang Nangbah-ni siani salko pangnan Sein Jaintia-rangsa dal·e manirongani gimin ia tom·anikoba Sein Jaintia dol ong·atangaha.
U Kiang Nangbah-ni chang 160-gipa siani salko gisik ra·e manianga
Date:
Share post:
