TURA: North Eastern Hill University (NEHU) Tura campus-ko ru·uta bilsirangna skangan kuliahaoba campus-ko chalaigipa Pro-Vice Chancellor dongjae aro pilakni gita maming namdapanirang dongkujaengani a·sel campus-o poraienggipa chatro chatrirangsan ong·aigija kam ka·enggipa manderangba neng·nikanirangko chagrongna nangtokenga ine Garoland State Movement Committee (GSMC), Garo Students Union aro All A·chik Youth Welfare Society (AAYWS) parakatenba, iani bidingo kamrangko nirokatchina gita a·dokni Governor Brig BD Mishra-na sedoataha.
Ia dolgittam NGO-rangni, Governor-na sedoatgipa chittio parakatani gitade, NEHU Tura campus-o Pro-Vice Chancellor dongjan baksana classroom, teaching room, office room aro uandakgipa nangchongmotgipa kuturirang dongjaengani a·sel campus-ko chalaianio neng·nikanirangko chagrongna nangengachim.
“NEHU Tura campus-ko namdapatanirang dongjaenganiara lekka porani kamrangko kal·steke roa gitasa ong·enga maina ia campus-ni bang·bata department-rangan, computer room, laboratory aro uandake nangchongmotgipa cholrang grisa chalaienga,” ine GSMC, GSU aro AAYWS dolrang parakataha.
2012 bilsio kuligipa History aro Archaeology department-ko da·o dipet Management building-onisa chalaienga, 2012 bilsio kuligipa Horticulture department-ko da·o dipet Bank aro Post Office-na rikgipa building-osa chalaienga aro 2012 bilsio kuligipa Computer Application department-koba Bank aro Post office-na rikgipa building-osa chalaienga ine talataniko on·angengon, ia department-rangna ta·raken building-rangko rike on·na nangenga ine NGO-rang parakataha.
2012 bilsio kuligipa Agri-Business & Food Technology baksana 2019 bilsio kuligipa Social Works department aro Forestry department-rangnaba da·o dipet nokrang dongkujaenga ine janapatskaengon, ia department-rangnaba ta·raken nokrangko rike on·china dolgittam NGO-rang dabiangaha.
Indake ong·engon, NEHU Tura campus-o kam ka·enggiparangko regularise ka·e on·china, kamni kri pilaknan apsan dormahako on·china aro campus-o assistant registrar aro deputy registrar-ko songe on·china gitaba ia dolgittam NGO-rang, a·dokni Governor-ko didiataha.