SHILLONG: Phulbari constituency-ni gitcham NPP MLA SG Esmatur Mominin Bristibar salo, All India Trinamool Congress (AITC)-o napangaha.
Bristibar salo, AITC-ni tom·bimonganiko Shillong songjinmao ong·atanio ua, sakgipin gitcham MLA Robinus Syngkon baksa AITC-o napangaha.
AITC-o napanggipa Robinus Syngkon-ara, Jaintia Hills Autonomous District Council (JHADC)-ni MDC-ba ong·engachim ine nikna man·a.
AITC-o napangani ja·man kobor ra·timgipa manderang baksa agangrikengon, ua batanggimin bilsibri atana NPP-chi dilenggipa MDA sorkari baksa kusi ong·e kamrangko ka·rimahaoba sorkarini mitam kamrango kusi ong·jahani gimin NPP-o ong·kate gipin dolo napskana tik ka·aha ine Mominin parakataha.
Adhoc aro SSA skigiparangni neng·nikanirangko ua Assembly-o janape on·an baksana Chief Minister aro Education Minister Lahkmen Rymbui baksaba agangrikahachim ine janapatengon, skigiparangni namgnina uni mol·molaniko sorkari knachakna gisik nangjaha ine Mominin parakataha.
Assam aro Meghalaya a·dokni simarango meligrikaniko ra·bana gita MDA sorkarini kamrangoba ua suk ong·nikjaha ineba NPP-ni gitcham MLA parakataha.
“Iandakgipa sorkarini kamrang angko namen suk ong·atjaha, uni giminsa anga AITC-o napskana tik ka·aha,” ine ua aganaha.
Maini gimin AITC-ko ua baseaha ine sing·anina aganchakaniko on·angengon, AITC-ko a·dokni gitcham chief minister Dr Mukul Sangma dilengani gimin Garo Hills-o bang·bata manderangan AITC-o namniktokenga aro manderangni iandake namnikaniko nike ua an·tangba AITC-o napna tik ka·aha ine Mominin parakataha.
“Mukul-ni chief minister ong·e a·dokko re·dilanio manderang kusi ong·tokaha aro da·o ua AITC-ko dilengani gimin manderangba kusi ong·enga. Uni giminsa angaba AITC-o napaha,” ine Phulbari-ni gitcham MLA parakataha.
Phulbari seat-ko ua chepiltaina ka·dongengama ine sing·on, “Batanggimin bilsibri atana angni Phulbari constituency-na kam ka·aniko nike aro constituency-ni manderang angna chakpaenganiko nike anga Phulbari seat-ko chepiltaina ka·dongchongmotenga,” ine Mominin parakataha.
Ia chang Assembly election-o una NPP-ni tikitko on·jahani gimin sing·on, maini gimin una tikitko on·jaha ua an·tangde ma·sija indiba ua an·tangan NPP-chi dilenggipa MDA sorkarini kam ka·ani bewalrango suk ong·nikjaha ine Mominin parakataha.
NPP-chi dilenggipa MDA sorkarini tangka paisarangko jakkalsretani gimin Garo Hills-o manderang matnangtokengani gimin ia chang election-o NPP, seat dambongana bate chejanaba gnang aro Garo Hills-o AITC dolan bang·bata seat-rangko chena sienga ineba Mominin parakataha.
“Chingni kobor man·soani gitade, Chief Minister Conrad Sangma-ba an·tangni seat-ko chepiltaina nangnikenga ong·ode rakbee kamrangko ka·na nanggen,” ineba ua aganaha.
Ia program-ko ong·atanio AITC-ni ‘MYE Card’ scheme-koba a·bachengate on·angjolaha.
Ia ‘MYE Card’ scheme-ara, AITC sorkariko rikna man·genchimode, da·o mikkang bilsi 5-ni gisepo ge lak 3 kamrangko on·na aro bilsi 21-oni bilsi 40 ong·gipa chadamberang, jemangan kamgri ong·e dongna nangengachim, uandakgipa chadamberangna japrako gong 1000/- ka·e on·na ra·gatgipa scheme ong·engachim.
