SHILLONG: South Turani United Democratic Party (UDP) candidate, John Leslee K. Sangma indake aganaha je Chief Minister, Conrad K. Sangmani kengokaniko namedaken ma·sichaksrangaia, maina mikkangchi nambatako ra·bagen ine ku·rachakaniko seenba uni noksako Tura town-o mittar 10-prakon tapdame donenga.
“Na·a Turaona re·anggenchimode, pilak biaprangon mikkangchi nambate dakgen ine Chief Minister-ni ku·rachakaniko seenba uni noksarangko tape donakosa nikaigen. Dokan damantion Anga Conrad baksa ine segipa noksakosako nikaigen. Ia noksarangko mongsongde una chakgiparangmacha tapade ong·ja, maina angni donggipachin noksarangko dingdeaha” ine re·baenggipa Assembly poll-o South Turao chief minister-ko mikkangchakna gita UDP-ni official candidate parakatako man·ani ja·mano Pa Sangma mijalo koborni manderangna aganaha.
Uni aganani gitade, chief minister-ni indakgipa kamrangko dakaniara, South Tura seat-ko man·pilgenma man·piljawahama ka·dongani grianiko mesoka, maina batanggimin bilsi bongani gisepo ua uni constituency-na aro uni manderangna mamingkoba ka·jaha.
Batanggimin bilsi bongani gisepo Chief Minister, South Turani manderangna kam ka·na gita cholrangko man·ahachim ineba UDP South Tura candidate aganaha.
South Turani manderangna CM mai kamrangko ka·aha ba ka·jaha uarang pilakkon manderang niatgen ineba ua agandapaha.
“Saksa joltangni MLA ong·e, constituency-ni manderangni namgnina kamrangko ka·na gita ian CM-ni daito ong·a. Anga chanchia, constituency-ni manderangna namgniko dake on·na bilsokgijanian Conrad-ni ja·manchakbatani ong·gen. Uni South Tura-ona re·anga changantian balwao bawile bon·aia, maina West Garo Hills-ni manderang gimikan uni dongchakramona re·angtokenga,” Sangma aganaha.
Garo Hills-o UDP-ni obostarangni bidingo sing·anina aganchakengon, UDP-na bang·en cholrang donga indiba rakbate kam ka·na nanggen ine Pa Sangma aganaha.
“UDP-de Khasi party-sa ine agangipade PA Sangma sagisa, jean Khasirangni chrokade chibrim mala gita dakaia aro UDP-de Garo Hills-ni manderangnade mamingkoba dakja-ka·jawa ine ine aganahachim,” ua aganaha.
