SWGH a·jao mobile vety unit-rangko Union Minister a·bachengate on·anga

AMPATI: Mongolbar salo, ma·mongni Fisheries, Animal Husbandry & Darying-ni Union Minister Parshottam Rupala, Mobile Veterinary Unit (MVU)-rangko South West Garo Hills a·jani Mahendraganj-o donggipa AH & Veterinary department-o a·bachengate on·angaha.
Ia MVU-ara matburingrangko sanna gita pilak nangchongmotgipa bosturang baksana doctor saksa, paramedical staff aro driver saksa baksa dongchakgipa gari ong·achim.
Ia MVU-rangko a·bachengate on·anganio Union Minister, jinmana aganprakengon, songadam nokadamrango matburingrangko altubate sanna banna man·na gita ia mobile unit-rangko a·songni Prime Minister Narendra Modi a·bachengate on·aha ine parakataha.
“Meghalaya a·dokna chinga bol 17 MVU-rangko on·aha aro iana 90 percent korosko India sorkari gamgen. Ia dakchakaniko ra·na gita 1962 nombor-ona phone ka·atnasan nangaigen, unon ia MVU-rang na·simangni nokrangona re·ange, na·simangni jilenggipa matburingrangko sanne bane on·gen,” ine Rupala parakataha.
Ia MVU-rangni dakchakanichi AH aro Veterinary department-ni official-rang, saenggipa matburingrangna tikarangko pilak dakgipa sabisirangkon sanna banna man·gen ineba Union Minister parakataha.
South West Garo Hills a·jao na·tok jilaniko bariatahani gimin Fisheries department-ko mittelpilangengon, na·tok jilaniko bariatanichi Meghalaya a·dok na·tokrangko gipin biaprangchi watskana man·gnok ine Rupala parakataha.
Tura-o donggipa Dairy Farm-ko namdapatna nangengani giminba ia tom·anio Union Minister aganangaha.
Prime Minister Narendra Modi-ni dilanichi a·songni simarango donggipa songrangko namdapatna kam ka·enga ineba Rupala parakataha.
“Iani bidingo chingko sima jolrangona re·ange, simarango songdongenggipa songni nokni manderang baksa agangrikchina ge·etaha,” ine ua aganaha.
Uni South West Garo Hills a·jaona re·baani gnigipa salo ua a·jao ra·gatgipa dingtang dingtang project-rangkoba niangaha aro Kalaichar-o donggipa Indo-Bangladesh Border Haat-koba niangaha.