SHILLONG: Meghalaya a·dokni dam 300-mangni gita polling station-rango manderangni pu·onanirang namen komiengani gimin ia polling station-rango manderangni pu·onaniko bariatna gita Election Commission, ‘Mission 300’-ko a·bachengataha ine a·dokni Chief Electoral Officer (CEO) Frederick R Kharkongor parakataha.
CEO-ni parakatani gitade, ia dam 300-mangni gita polling station-rango manderangni pu·onani 20 percent-na baten komibatengani gimin Election Commission-ni a·bachengatgipa ‘Mission 300’-chi ia polling station-rango pu·onaniko bariatna rakbate kamko ka·anggen.
“Da·o mikkangchi ong·atna sienggipa election-rango ia polling station-rango manderangni pu·onaniko bariatna gita dingtangmancha gisik on·e kamko ka·china deputy commissioner-rangna ge·etaniko on·ataha,” ine Kharkongor parakataha.
Batanggimin chang Assembly election-o a·dok gimiko pu·onani 87%-mang ong·ahachim ine janapatengon, ia dam 300 polling station-rango pu·onaniko bariatenba a·dok gimiko pu·onaniko 90%-ona tang·doatna jotton ka·gen ine CEO parakataha.
A·doko dingtangtegipa polling station-rangni gimin toe janapatengon, Amlarem-ni Kamsing aro Shella-ni Kalatek-o election official-rang, ringrangosa polling station-rangona re·angna nanga aro Nongriat-onaba official-rang, baditaba kontarangna ja·achi re·esa sokangna man·a ine Kharkongor parakataha.
Garo Hills-oba bang·a polling station-rangonan bolchi tarigipa dolongrangko batesa re·na nanga ineba CEO parakataha.
Kharkongor-ni parakatani gitade, je polling station-rangon 30%-na komibatachim, uandakgipa polling station-rango pu·ongiparangni biming segataniko nambatatna gita Election Commission, ‘Mission UNITE’-ko a·bachengatskaaha.
State Election department-ni ra·gate on·gipa ‘Super 6’ program-ko Chief Election Commissioner Rajiv Kumar a·bachengate on·anggen ineba CEO parakataha.
“Ia program-ni gita chinga maini gimin re·ange pu·onna gita nangachim, uarangni bidingo manderangna talate on·gen,” ine Kharkongor aganaha.