SHILLONG: Budbar salo Meghalaya Cabinet, State Tourism Policy 2023, State Organic & Natural Farming Policy, Meghalaya Advertisement Policy 2023, Drug Reduction & Elimination aro Action Plan-ko ra·chakangaha.
Iani bidingo u·iataniko on·angengon, Tourism policy-ko 2011 bilsiosa bon·kame tariaha aro ua somoioni Tourism department-o bang·en dingtanganirangko nikna man·ahani gimin ia gital somoini kri gital Tourism policy-ko tarina nangao ga·akaha ine Chief Minister parakataha.
Ia gital Tourism policy-ni bidingo talataniko on·angkuengon, Tourism-ni kamrango bang·en dingtanganirang dongahaoba niam gita dal·roroanirang dongjaengani gimin ia Tourism policy-ara niam gita Tourism-ko dal·rorona dakchakani ong·gen ine Chief Minister parakataha.
State Organic & Natural Farming policy-ni bidingo janapatskaengon, Organic Mission-ni kamrangko chu·sokatna gita ong·telaigipa gama ge·anirangna dongimin bewal, certificate-rangko on·ani aro nangani kri ja·kurangko de·ani bidingo ma·sina gita ia policy-ko ra·gatna nangaha ine Chief Minister parakataha.
Drug Reduction & Elimination aro Action Plan-ni bidingo talataniko on·angskaengon, a·doko pekatgipa samrangko champengani kamrangko niam gita kam ka·na iako ra·gataha ine Chief Minister parakataha.
Meghalaya a·dokko pekatgipa samrangoni jakgitel ong·atna gita ia kamko ka·anio pilak department-rang aro police department baksa nangrime ja·kurangko de·anggen ineba Sangma parakataha.
Republic Day-ni salo on·na sienggipa Meghalaya Day award-rangni bidingo janapatskaengon, Art & Literature-na U Tirot Sing Award-ko Sweetymon Rynjah-na, Social Service-na Pa Togan Sangma award-ko Dr Jennifer Basaiawmoit-na aro Sports & Games-na U Kiang Nangbah award-ko K Marak-na on·angskagen ine Chief Minister parakataha.
