TURA: Meghalaya-o gnigipa ong·e dal·batgipa Tura jillao, lak 1-na bate Garo manderang songdonga aro ian Garo Hills gimikna janggi tangani, poraiani aro chalaiani biapba ong·a. Nangchongmotgipa cholrangko man·jani a·selo batanggimin salrango ia biapo bang·a neng·nikanirangko man·ahachim indiba da·o Tura jillao bang·a daka-rikanirangko tarianichi namdapanirangko nikna man·enga.
Dal·roro-silroroaniko man·gipa Shillong gita Tura-ode ru·uta bilsirangna pilak namroro-silroroanirangko dingtang dingtang a·selrangchi ra·bana gita man·jaha aro iarangoni mongsongbatgipa a·selara bang·a bilsirangna iano namdapanirangko dakna gita bang·gija tangkarangkosan tikatani gimin ong·ahachim.
Indiba, 2018 bilsi dipet, Garo Hills-ni mongsonggipa jillao dingtanganirangko nikna a·bachengaha. Iani a·selara MDA sorkarini Turao daka-rikanirangko tarie namdapate aro cholrangko ra·bae a·dokni skotong Shillong gitan apsan dake tarina miksone kam ka·anichi ong·aha.
Meghalaya a·dokni Chief Minister Conrad Sangma an·tangan South Tura-ni ong·ani gimin, Turako mamung chol donggijagipa jillaoni nitogipa songjinmaona ong·atna gita gisik nange jotton ka·aha aro dingtangmancha daka-rikanirangko tarianio mongsong kam ka·aha.
Tura jillani namroro-silroroanira Garo Hills-ni tourism-na aro Meghalaya-naba namroro-silroroaniko ra·baa. Nokrek, Siju aro uandakgipa manderangni nina re·ronggipa biaprangko name dake tarina gita nanga.
Dal·batgipa aro manderangni mongsongbate da·ororo aganenggipa Tura-ona da·ororo sokbagipa namdapataniara P.A. Sangma Football stadium ong·a, jeon sak 9500-na baten manderangna asongna biap donga.
Ian India-ni dal·batgipa football stadium ong·a, jekon pre-engineered technology-ko jakkale tariaha aro bilsi 2-ni gisepo matchotaha. Ia stadium-o wal-sal robol kal·anirangko ong·atna gita chuaoni teng·atna man·gipa bijolirangkoba, chong·motan flood light-rangkoba tekaha.
Gitchambegipa Chandmari stadium-ko taridape, mandeni tarigimin samsirangko anne uko namdapataha aro FIFA standard-ni gita ong·ataha aro ramako taridapaha aro sak 3000 manderangna asongchake nina gita tariaha, uandaken Tura-o kal·susagiparangna namdapataniko on·aha.
Iana agreba, sorkari Tura PRIME Hub-ko rikna gitaba ja·ku de·aha.
3200 sq ft-o bading-chiwalaniko a·bachengdile kam ka·gipa manderangna altuae aro name kam ka·na man·na gita biapko tariaha. Ia biapara, namgipa, dal·gipa aro air-condition gnang manderangna kam ka·rimani biapko computer system-rang baksa sak 40 manderangna tarigimin ong·a aro uamangna dingtang kutturio tom·anirangko dakna gitaba tariaha. Ia biapo mande sak 30-na chakgipa video conference room aro learning center-ba donga.
MDA sorkari, Garo manderangni ga·sugipa aro dingtangmanchagipa jatni dakbewalrangko gipin manderangna mesokna nangnike Tura Integrated Hospitality & Convention Centre-koba rikna a·bachengaha.
Pangchakani ro·ongko adita salrangna skang songaha aro convention centre-o nambatgipa cholrangko ra·e tarigen jedakode manderang re·bae Garo manderangni jat aro dakbewalni gimin nikangna gita man·gen.
Ia Project-ni ning·o convention-ni kamrangna aro sokgipa manderangnaba nanggipa pilakkon tarigen. Dal·gipa Plaza-ko jatchio tarianiko dakgen, changrogipa observatory clock tower ba niwatram jean Tura a·brichipak mikkanggen, chi baksa tarigimin amphitheatre aro biaptangni bosturangko aro jakchi tarigiminrangko palna-sim·na biaprangko tarina gitaba ia projectni ning·o chanchimanaha.
Indake ong·engon, Tura-ni dambri bibrarangko namdapatna gitaba sorkari jako ra·aha aro iano Public Space ba jinmani biaprangko taridapna gita miksongenga, (Araimile, Chandmari, Hawakhana aro uandakgiparang), bolrangko ge·ani aro biapko nitoatanirang, bibrarango sororkrangko dal·dapatani, pakmarango noksarangko salani, Footpathrango Pavement Blockrangko annani, aro ia bibrarango bijolirangko tekanikoba daknasienga.