SHILLONG: Re·baenggipa February jao ong·atna sienggipa Assembly election-na tarisamsoanirangko nina gita Chief Election Commissioner Rajiv Kumar-ni dilanichi, Election Commission of India (ECI)-ni official-rang, Meghalaya a·dokni skotong Shillong songjinmaona re·baaha.
Sukrobar salo, Chief Election Commissioner Rajiv Kumar-ni kobor ra·timgiparangna parakatani gitade, ia chang Assembly election-o a·dok gimikni sak 21,61,729 manderang, an·tangtangna on·gimin bilo pangchake dilgiparangko seokanio bakko ra·anggen ine ka·dongsoenga. Da·o dipet Meghalaya a·doko me·asa pu·ongiparang sak 10,68,801 aro me·chik pu·ongiparang sak 10,92,326 donga.
Meghalaya a·doko person with disabilities (PwD) ba be·enni gita cholgri ong·e pu·ongiparang gimik sak 7478 donga, bilsi 100 batgimin pu·ongiparang sak 290 aro bilsi 80 aro una batgiparangba gimik sak 22658 pu·ongiparang donga.
A·doko skanggipa changna pu·onna sigiparangara gimik sak 81,443 dongskaa.
Meghalaya a·dokona sokbaani ja·man, Election Commission-ni official-rang, dingtang dingtang political dolrang baksa tom·e chanchirimangaha aro a·dokni Chief Secretary, Director General of Police (DGP), District Magistrate-rang, Superintendent of Police (SP), state officer-rang aro dingtang dingtang officer-rang baksaba tom·e election-ko ong·atani bidingo chanchirimangaha.
CEC-ni parakatani gitade, Meghalaya a·doko election-ko name ong·atna gita model polling station, women-in-command polling station, chadamberangchi chalaigipa polling station aro green polling station-rangkoba dongen.
Meghalaya a·dokni jilla jolrango dam 325 polling station aro songadam nokadamrango dam 3157 polling station-rangko man·chape gimik dam 3482 polling station-rang donggen ineba Kumar parakataha.
