SHILLONG: Re·baenggipa jao ong·atna sienggipa Meghalaya Legislative Assembly election-o Trinamool Congress (TMC)-ni dilgipa Mukul Sangma-ni Songsak aro Tikrikilla constituency damgnio susana manchianiara uko chu·sokgipa ong·atjanaba gnang ine Chief Minister aro NPP-ni national president Conrad Sangma-ni aganani ja·man Sonibar salo, TMC-ni tom·bimonganiko Tikrikilla constituency-o ong·atanio sak 5000-mangni gita manderang bakko ra·e uko rimchaksotokskaaha.
Ia tom·bimonganio Meghalaya TMC-ni state general secretary Mukul Das, Mizanur Rahman Kazi aro Prabir D Sangma-ko man·chape TMC-ni dingtang dingtang dilgiparangba bakko ra·angtokaha.
Ia tom·bimonganio Opposition TMC dolni dilgipa Mukul Sangma, jinmana aganprakangengon, dingtang dingtang jatrangni gisepo meli-nangrime aro ka·sagrike songdong a·chana nangani gimin aganangaha.
“India a·songara dingtang dingtang jatrangni songdong a·chagipa a·song ong·a aro Meghalaya a·dokoba chengonin an·chingni pagitcham ma·gitchamrang tom·tomao aro meli nangrimao janggi tangna gita skie donangaha. An·ching dakgrik dinggriksimaiode saksa sakgipin baksa apsan songdong a·chana man·jawa. An·chingni pagitcham ma·gitchamrangni dake mesokanggipa kamrangan an·chingko mande ra·grikna, ka·sagrikna aro meli nangrime dongna skiaha. Ia gunara an·chingna mikkangchi nambata salrangko ra·bana sienga. Iako chu·sokatanian chingni daito ong·a aro iani giminsa chinga ianona re·baaha,” ine Sangma aganaha.
Dingtanganina pu·onchina gita manderangko didiangengon, dilgipako seokenggipa manderangan dilgiparangni kamo kusi ong·jaenga ong·ode uamangni pal gipinko seokskaanian nambatgipa chol ong·a ine Sangma parakataha.
Ia apsan salon National People’s Party (NPP)-ni sak 60-na baten membor-rang, Meghalaya TMC-o napangaha aro uamangko TMC-ni dilgipa Mukul Sangma rimchaksotokaha.
