TURA: National People’s Party (NPP)-chi dilenggipa sorkarini a·kangenggipa FOCUS program-ara ma·mong sorkarini ra·gate on·gipa KISAN scheme-sa ong·achim aro ia scheme-ko a·dok sorkari biming dingtangate, game ge·e cha·giparangna tangka paisarangko komibate on·aha ine adita salrangna skang Union Minister of State (MoS) John Barla-ni matnanggipani bidingo NPP-ni national president aro Meghalaya a·dokni chief minister Conrad Sangma maming aganchakaniko on·jaenganina United Democratic Party (UDP)-ni John Leslee K Sangma sing·doatskaenba, iani bidingo aganchakaniko aro talataniko on·china dabiangaha.
FOCUS program-ni ning·o NPP-chi dilenggipa a·dok sorkari, game ge·e cha·enggipa manderangni kamrangko tang·doatna gita gong 5000 tangkako producer group dolprakni membor-rangna on·engachim ine nikna man·a.
Indake ong·genchimoba, ma·mong sorkarini ra·gate on·gipa KISAN scheme-ni ning·o gong 6000/- tangkarangkosa on·ahachim aro ia scheme-ko NPP-chi dilenggipa a·dok sorkari biming dingtangatskae, game ge·e cha·giparangna gong 5000/-kosan on·skaenga ine adita salrangna skang Minority Affairs-ni Union Minister of State John Barla-ni Garo Hills-ona re·baani somoio matnangatahani gimin iani bidingo UDP-ni dilgipa aro South Tura constituency-ni candidate John Leslee Sangma sing·doataha.
“Ia scheme-ni gong 1000/-kode election-ni somoio vote-rangko brena gita NPP sorkari ra·rikaha ine Barla matnangaha. Uni iandake matnanganiara kakket ong·bebegenchimode ian namen dukni katta ong·gen maina Conrad-ni agana gita a·dok gimikni lak 4.5 producer-rangna gong kror 500-ko chambebegenchimode gong kror 45 tangkarang gimagen aro ia matnanganiara kakket ong·bebegenchimode a·dokni producer-rangko NPP-chi dilenggipa sorkari cha·boka ga·akenga,” ine Sangma parakataha.
Iandake matnanggipani bidingo NPP-ni national president, maming aganchakaniko on·jaenganina aro maming sandirokna manchianirang dongjaengani giminba ua aiao inmananiko parakataha.
“Da·o dipet sawa kakket aro sawa tol·enga an·ching darangba name ma·sina man·kujaenga indiba iandake matnanganiara namen chanchina nanggipa kam ong·engani gimin iani bidingo chief minister, aganchakaniko aro talataniko on·na nangchongmotachim. Indiba uni jrip donganiara namen aiao inmananiko ong·atenga,” ine UDP-ni dilgipa aganaha.