SHILLONG: Je a•songoba chadamberangan nangbatgipa aro nambatgipa manderang ong•a. Silroro-namrorobaenggipa a•songrango chadamberang bang•genchimode uamangni pora-skianirangna, an•seng-baljokanina aro uamangni man•gnirangko on•ode aro rakkiode bang•a namdapanirangko nikna gita man•gen. Da•alni chadamberangara knalni kam ka•giparang, rikgiparang aro dilgiparang ong•a. Manderang bang•batan bilsi 29-ni gisepo ong•gipa ong•ani gimin, a•gilsak gimikni gisepo India-on dambebatgipa manderang donga ine aganna gita man•gen. Meghalayao songdonggipa manderangoni 74%-de bilsi 35-na komia aro ian national average-na bata, aro ia indakgiparang donganichi a•doko bang•a cholrangko man•a ama.
Manderang bang•rorobaan baksanan janggi tangani cholrang dongjani a•sel, a•dokni chadamberang dingtang dingtang namgija kamrangona sokna altua jekai pekgipa bosturangko jakkalani, me•a ba me•chikko ong•gija bewalo dakani, an•chi-pari nikatani aro uandakgiparang. Chadamberangan dingtang dingtang ong•gijagipa kamrangona re•sretna altua aro iara dingtang dingtang a•selrangni gimin ong•a jekai social mediako jakkalani, a•gilsak gimiko janggi tangani bewalrang dingtangani, cholrang donggijani, chu aro pekgipa bosturangko altuae man•ani. Da•ororoni chadamberang songsaroni an•pilna jotton ka•bata ine nikna gita man•a.
Re•anggipa sorkari ia neng•nikaniko a•doko namatna gita krenge kamko ka•jaha. Janggi tangani cholrangko on•na, changa-sapanirangko skie on•na, aro chadamberangko bak ra•atna dingtang dingtang kamrangko bikotna ja•ku de•anirangko batanggimin sorkari dakjaha. A•dokni chadamberangna mamung policy ba niamrang aro program-rangko tarijaha.
Ia dal•begipa songsarni jumangrangko mikgitalo chu•sokatna ku•chake, NPP-ni dilgipa sorkari dingtangmancha name chanchisoe cholrangko a•dokni chadamberangna tariaha jedakode uamangni changa-sapanirangko name jakkalna gita man•gen. Chadamberangko silroro-namroroaniona sokatna gita nanggipa cholrangko sandina sorkari nangnikaha aro iarang pilakon nanggipa dakchakaniko on•a kam ka•na miksongaha.
Da•o ong•enggipa sorkari 2018 bilsio a•bachengon, bang•a tom•anirangko dingtang dingtang bako ra•giparang, Government department-rang, skie on•giparang aro chanchirimgiparang baksa ong•ate chadamberangni neng•nikanirangko namatna gita policy ge•sako tarina gita tik ka•aha. Uandaken, 2021 bilsio- Meghalaya State Youth Policyko seaha aro chapa ka•aha. Ia policy mongsonggipa neng•nikanirangko namatna miksongenga aro dingtangmancha pora-skia, changa-sapaniko skie on•ani aro janggi tangani cholko on•ani, bading-chiwalaniko a•bachengatani, an•seng-baljokani, janggi tangani bewal, kal•susaani, songsaro janggi tangani namgipa bewalrang, manderang baksa bakrime kam ka•anirang, chadamberang baksa kam ka•anirang, darangkoba watchanggijani aro songsaro mikkang nigija apsan ong•e janggi tangani.
Biaptangni bading-chiwalgiparangko bikotna aro niksengatna miksonge, PRIME-ko a•bachengataha (Promotion and Incubation of Market-driven Enterprises). Ia programni niksamsoaniara chadamberangna bading-chiwalaniko dakna dingtang dingtang cholrang jekai tangka srona, nanggipa technology, changa-sapani, aro agan-ku•pattuani, aro dal•dalgipa antidamrangona sokatna dakchake janggi tangani chol dake ra•anian ong•a. PRIMEni gita, chadamberangko janggi tangani dingtanggipa cholrangko sandina gita didienga aro kamko sandigiparang ong•aigija sakgipinna kam on•skagipa ong•na gitaba didienga. Da•alona kingking, sak 1,400 bading-chiwalaniko a•bachengdilgiparang ia programni namgniko man•aha. Ge 4 PRIME Hubrang kamko ka•enga. Ge 279 startup-rangna tangka-paisarangchi dakchakaniko on•aha. Karnataka aro Gujarat baksa PRIMEko India gimiko nambatgipa startup ecosystem ine boksis on•aha. .
A•dokni mingsa mongsinggipa dakna nanggniara skulo poraigiparangni dontonganiko namatanian ong•a, Sorkari dingtang dingtang skie on•anirangko skul bi•sarangna on•na nangnikaha jekai soft skills, life skills, aro mandeska baksa agangrikani. Iarangko dakanichi bi•sarangna ka•dongataniko on•anisan ong•aijawa indiba chubata gadango poraiangkunaba dakchakani ong•gen. Ia miksongani gnang, ASPIRE programko tariaha aro chatro-chatrirangna on•aha. Ia programchi, sak 23,000-na baten chadamberangna skie on•aha.
ASPIRE programni bidingo CM Conrad K Sangma indine aganaha, “An•chingni chatro-chatrirang sakprakan an•tangtangni bil ama dipet manderangna, songsarna, a•dokna aro a•songna on•gilna nanggen. ASPIRE ge•sa program ong•a jean an•chingni a•dokni chadamberangna nama dingtanganiko ra•bagen.”
Changa-sapaniko skina nanganiko nike, Sorkari ‘Skills Meghalaya’ programko a•bachengataha jechin lak 1.2 chadamberangna re•baenggipa bilsi 5-ni gisepo janggi tangani cholrang aro bading-chiwalaniko a•bachengatani bidingo skie on•gen. Changa-sapaniko skian baksana, a•doko donggipa skie ra•ani cholrangkoba rikna, taridapna aro namdapatna nanga. Sorkari a•dok gimiko ge 2000 skulrangko taridapna gita tikataha jeonin ge 250 skulrangko tariman•aha. Ge 39 EMRS-ko (Ekalavya Model Residential School) poraiani gadang aro tarianiko namapdatna guta a•bachengatenga. Sorkari dam 700 skulrangna baten Smart School kit-rangko sualataha. Dam 21 People’s Collegerangkoba a•doko a•bachengatenga jedakode namgipa pora-skiani pilakonan sokna gita man•gen.
Sorkari Meghalaya School Improvement Programko skulrangko nambatatna aro bilakbatatna a•bachengataha aro da•ona kingking dam 840 skulrangna kam ka•ani matchotaha. Sak 28,000 elementary skigiparangko online skie on•anio bak ra•na gita bimung segataha jedakode skie ra•aniko namdapatna man•gen. Krenge kam ka•anichi aro da•o ong•enggipa sorkarini on•kanganichi, a•dokni gross enrollment ratioba tang•doaha aro Indiani a•dokrang baksa nambatgipa gadang 10-ona gadoaha.
Meghalayara jatni dakbewalo bilongen man•e cha•gipa ong•a aro manderang saksa sakgipin baksa janggi tangrimna, ku•cholsan meli-nangrimna aro bi•sarang ma•a-paa baksa dongrimna namnikgipa ong•a. Gipin a•dokrang gita, a•dokni manderang gipin biaprangona janggi tangani cholrangko sandina re•anganiba komia. Sorkari iako nike IT park-ko rikna ja•ku de•aha jedakode a•doktangni chadamberangna janggi tangani cholrangko bikotna man•gen. Name dake aro nitoe, Shillong IT Parkko rikaha Jean IT/ITeS sector-o ge 1500 kamrangko nakatataha. Ia projectni gnigipa bako 4000 kamrangko bikotkugen.
Dingtang dingtang bilsirangni chadamberang dingtang dingtang nangnikanirang donga jekon chu•sokatna gita nanga. Sorkari chadamberangni namroro-silroroanina aro songsarko bilakatna gita chadamberangko bak ra•ate kamrangko ka•na jotton ka•enga. YESS (Youth Engagement through Empowered Youth Organizations)-ko a•dokni 3000na bate chadamberangona sokatna gita a•bachengataha, aro iachi chadamberangna dingtang dingtang programrangko jekai samtangtangko ripingani, tangka-paisako name jakkalani bidingo skie on•ani, pekgipa ringa-cha•anirangko jakkalani bidingo mikrakatani, on•kange kam ka•ani aro gisikni an•seng-baljokani bidingo mikrakatani aro uandakgiparangko ong•ate uamangko bak ra•atenga. Iako dakna, nambatgipa youth clubrangna lak 1-ona kingking tangka-paisarangchi dakchakaniko on•enga.
Meghalaya 1972 bilsio a•dok ong•chengaonin kal•susaanirangko dake janggi tangbagipa ong•a. Nambatgipa rikanirangchi kal•susachakani biaprangko tariengaha, iachin a•doko namnamgipa kal•susagiparangko sandiani chu•sokgipa ong•gen. Meghalayani State Sports Policyni gita, kal•susaanio aro bil-jakni kamo gisik nange ka•aniko Meghalayani dakbewalo aro janggi tangbewalo ra•baanian ong•a. Meghalaya Sorkarini bebera•ani gitade, kal•susaanirango bak ra•anichi mandeni dakbewalko aro janggi tangani bewalko namdapata, mandeska baksa janggi tanganio meli-nangrimata aro janggi tangani cholrangko ra•baa. A•dokoniko Olympian-rangko ong•katatna miksonganiko done, Skotong Minister Conrad Sangma indine aganaha, “Olympian-rangko ong•atani mongsonggipa dakna nanganiara bilsini kri changgipa-sapgipa manderangko am•sandianin ong•a. Jekai, 2024-ni Olympicsna sandie tarina nanggiparangara da•o bilsi 15-20-ni gisepo ong•giparangan ong•a. 2028ni Olympics-nade, una bateba bilsi chonbataniko sandina nanggen. Chinga MSOA baksa changgipa-sapgiparangko sandina aro uamangko bilakatna gita kam ka•enga”. Ia programmeni ning•o, dingtang dingtang bilsirangni bang•a bi•sarangko nisusagen aro jemangan changa-sapaniko mesoka, uamangna dingtangmancha tarisogimin skie on•anirangko dakgen.
Chadamberangni mikkim gnanganiko mamungchiba sokna amja. Dambe ong•anian mamungchiba tona amgijagipa darangni bilchiba sokna amgijagipa gam ong•a. Uanangna nanggipa cholrangko, dilaniko aro biapko on•aniara ma•a-paani aro pilak dal•giminrangni jako ong•a jedakode uamang songsaro dingtanganiko ra•baanio bilakgiparang ong•gen. Chadamberangni bilan bilaktbatgipa bil ine aganani gnang. Aro ian kakket ong•a, maina a•songo donggipa chadamberangni bilko mamungchiba rona amja aro uamangnasan ong•aija indiba uamangni samtangtango donggipa pilaknan dal•rorona gita cholko on•a.