TURA: Re·baenggipa February jani gisepo ong·atna sienggipa Meghalaya Assembly election-o Raksamgre constituency-oni susana gita Garoland State Movement Committee (GSMC) Pedaldoba regional unit-ni chairman aro Save B Mahal Committee-ni chairman Rimjen Ch Sangma, Bharatiya Janata Party (BJP)-ni tikitna dorgasto galgen ine u·iataha.
Sangma-ni u·iatani gitade, Mongolbar salo ua Raksamgre constituency-ni ning·o donggipa B Mahal jolo tom·aniko ong·atangaha aro ia tom·anio B Mahal aro A Mahal jolo songdongenggipa manderang baksana nokma sordar-rangba uko BJP-ni tikitchi susachina diditokahani gimin ua BJP-ni tikitna dorgasto galna manchie donangaha.
“B Mahal aro A Mahal jolo songdongenggipa bang·a manderangan angna chakpaanirangko on·engani gimin aro dakchakanirangko on·engani gimin anga uamangko mittelpilna ska. Uamangni nangnikani gita anga Budbar salo, BJP Garo Hills-ni unit-ni dilgiparangko grongegen aro BJP-ni tikitna dorgastoko galgen,” ine GSMC Pedaldoba regional unit aro Save B Mahal-ni chairman parakataha.
Election-o susae ua chu·sokgipa ong·genchimoba ong·jagenchimoba, B Mahal-o songdongenggipa manderangko chel·chakna ua kamko ka·angkugen ineba Sangma parakataha.