SHILLONG: Meghalaya a·doko nangana bate tangka paisa jakkalgipa dam 34 Assembly constituency-rang donga aro ia constituency-rangko bilakbate nirokanggen ine Bristibar salo, a·dokni Chief Electoral Officer (CEO) FR Kharkongor parakataha.
Meghalaya Legislative Assembly-ni general election-ko re·baenggipa February jani 27 tariko ong·atna siengachim.
“Chingni kobor man·soani gitade, a·dok gimiko nangana bate tangka paisa jakkalgipa dam 34 Assembly constituency-rang gnang aro ia biaprango chinga nanga gita chel·chakgipa dolrangko donate, election-ni niamrangko bilakbate nirokanggen,” ine Kharkongor, kobor ra·timgiparangna aganaha.
CEO-ni parakatani gitade, Meghalaya a·dok gimiko ‘bilgrigipa’ dam 747 polling station-rang donga aro dam 399 polling station-rangkoba dingtang dingtang a·selrangni gimin kenchakna nanggipa polling station ine chanaha.
Meghalaya a·dok gimikon Model Code of Conduct (MCC)-ko ra·gatmanahani gimin niam pe·giparangko nirikkina gita General Observer, Expenditure Observer aro Police Observer-rangko dongen ineba Kharkongor parakataha.
Ia Assembly election-o dol 120 central armed police force (CAPF) ba ma·mongni sipairangko a·dokni dingtang dingtang biaprangko dongen ineba ua aganaha.
CEO-ni parakatani gitade, da·o dipet a·doko dongsoenggipa dol 10 CAPF baksana gimik dol 40 CAPF-rangko dingtang dingtang biaprangko donatmanaha.