Tura: NPP an·tangni bilko man·taipilna changsatai Sombar January 23 dipet campaigning-ko Adokgre-oni a·bachenggen.
Pagipa saagini election-na re·mikkanganio Adokgrean NPP-na gimikna bate rasong gnangbatgipa ong·angaha, uni gimin uamang pangna changon election-ni somoio campaigning ka·aniko North Garo Hills, Kharkutta contituency-ni Adokgre-oni a·bachengrongaha.
Party-ni u·iattimgipaoni aganani gita party tom·aniko mijao mangmang a·bachenggatgipa Chenangre stadium-o ong·atna mol·molaniko dakataha, jemangan bilko changsatai man·pilna gita namen raken kam ka·enga.
“Ia chinga gimik sak 58 candidate-rangna uamangni bak ra·na man·jagenchimoba u·iataniko dakaha. Indiba party-ni monssonggiparang jekai Prestone Tynsong, Snaiwbhalang Dhar baksana Chief Minister, Conrad Sangma aro uni adagipa James Sangma aro NPP-ni gipin MLA-rangko ua tom·anio bak ra·na ka·dongsoahaw,” ine party-oni palo u·iattimgipa aganaha.
Sak 5000-na bate chakgipa manderangni bak ra·aniko dakna ka·dongsoaha.
“Ching nama biteko man·na ka·dongsoenga aro re·baenggipa election-o bang·a seat-rango chena ka·dongsoaha. Chingni kam ka·anirangko a·dokni manderang nikangtokaha aro uamang apsan dakgipa kamrangko ka·angkugen ine bebe ra·toka, uamang NPP-kon mikkangchakba sorkariko rikako nangniktokaha,” ine agandapaha.
