Gambegre-ni NCP MLA, kamtangko wate Congress-o napanga

SHILLONG: Re·baenggipa February jani 27 tariko ong·atna sienggipa Meghalaya Legislative Assembly election-na skang, Nationalist Congress Party (NCP)-ni state president aro Gambegre-ni MLA Saleng A Sangma Sombar salo, doltangko aro kamtangko watenba, Indian National Congress (INC)-o napangskaaha.
Saleng, an·tangni kam watani chittiko Sombar salo, Meghalaya Assembly-ni Commissioner & Secretary Andrew Simons-na on·eaha aro uni ja·man attamchibara uko Congress dolona Meghalaya Pradesh Congress Committee (MPCC)-ni president Vincent H Pala aro gipin dilgiparang rimchaksotokaha.
Congress dolo napangna skang, an·tangni NCP-oni ong·katani aro MLA ong·aniko watani bidingo kobor ra·timgiparangna parakatengon, ua indita bilsirangna NPP-chi dilenggipa MDA sorkario bakrimahaoba, uni manderangna kam ka·anio dingtanganiko ra·bana gita ua maming cholrangko man·jahani gimin da·o biap nambataoni manderangna dangdike on·na re·baskaaha ine Sangma parakataha.
Kamko ka·rimanio ua NCP baksa kusi ong·na man·jaha ineba Sangma parakataha.
“Angni NCP baksa kamko ka·anio anga angni nangnikani gita manderangna dangdike on·na man·jaha aro iani giminsa anga manderangna nambate kamko ka·na man·na gita biapko nangnikaha. Angni nangnikenggipa biapko da·o angna Congress dol on·na man·gen ine anga bebera·a aro iani giminsa anga da·alo dingtang ramako re·na nangnikaha,” ine Gambegre-ni gitcham MLA aganaha.
Congress-ni gitcham dilgiparang wate kattokahaoba ua da·alo Congress-ona re·baskaenga ine janapatengon, “Angni ia ja·kuko de·anina haida mitam manderang angko goka ine inengnaba gnang indiba angni miksonganian manderangna dangdike on·anisa ong·enga aro Congress dolo angna dal·bata biapko on·na sienga,” ine Sangma parakataha.
February-ni 27 tariko ong·atenggipa Assembly election-na skang da·o dipet a·dok gimikni sak 19 MLA-rang, kamtangtangko wataha aro uandaken da·o sak 60 MLA-rang donggipa Meghalaya Legislative Assembly-o sak 41 MLA-rangsan dongaiahachim.