TURA: Ru·utbea bilsirangna Assam aro Meghalaya a·dokni simarango ong·enggipa golmalrangko aro meligrikgijanirangko namatna kam ka·anian ia chang Assembly election-o National People’s Party (NPP)-na namgipa cholko on·ani gita ong·gen ine Sombar salo, a·dokni Chief Minister aro NPP-ni national president Conrad K Sangma, an·tangni ka·dongchakenganiko parakataha.
Sombar salo, NPP-ni election campaign ka·aniko Adokgre songo a·bachengatani ja·man kobor ra·timgipa manderang baksa agangrikengmiting somoio Sangma ia kattarangko aganaha.
Meghalaya a·doko dal·batsranggipa dolsan ong·aigija ia Assembly election-o NPP, bang·bate seat-rangko chegen ineba ua an·tangni ka·dongchakenganiko parakataha.
“Batanggimin somoirango gitcham sorkarirang, a·dok damgnini simarango ong·enggipa obostarangko namatna ja·kurangko de·chipjahani gimin ian ia election-o NPP-na namgipa cholrangko on·ani gita ong·gen. Gitcham sorkarirang ia kamko, politics-ni gita nangchakeanirangko man·na kenchakenba jako ra·tokjaha indiba chinga dingtange chanchienba, iako dakanichi manderangna nambate dangdike on·na man·gen ine jako ra·skaaha. Dingtang dingtang neng·nikanirangko chagrongna nangahaoba chinga re·mikkange, meligrikna man·jaenggipa biaprangoni mitamko namatna gita Assam sorkari baksa soi ka·grikaha,” ine Sangma aganaha.
A·dok damgnini simarango songdongenggipa manderangni neng·nikanirangko namatna gita ia sorkari, manderang baksa nangrime kamko ka·aha, songadam nokadamrango changni chang tom·anirangko ong·ataha aro iachi namatani cholrangko ra·bana ja·kuko de·aha ineba a·dokni Chief Minister parakataha.
“A·dok damgnini simarango ong·enggipa golmalrangko namatna nambatsranggipa cholkode man·jawa indiba cholko sandina chinga kam ka·enga. Ia neng·nikaniko namatna NPP sorkarimangmangsan ja·kuko de·ahani gimin ian chingni gisiko nange kam ka·aniko mesokani ong·a,” ine Sangma aganaha.
Assam aro Meghalaya a·dokni simarango meligrikna man·jaenggipa biaprangoni skanggipa bako damdok biaprangko namatchengna gita Meghalaya a·dokni Chief Minister Conrad Sangma aro Assam a·dokni Chief Minister Himanta Biswa Sarma, re·anggipa 2022 bilsini March 29 tariko, Memorandum of Understanding (MoU)-o soi ka·grikangahachim indiba a·dok damgnini soi ka·grikanio Meghalaya a·dokni bang·a songrangkon Assam-o man·angenga ine dingtang dingtang dolrang aro songni nokni manderang, ia MoU-ko den·galpilchina dabitokskaahachim ine nikna man·a.