SHILLONG: Re·baenggipa February-ni 27 tariko ong·atna sienggipa Meghalaya Legislative Assembly election-na a·dokni Election department, kamrangko ka·chichaengaha.
Iani bidingo kobor ra·timgiparangna u·iatengon, Assembly election-na Election department, sak 19,500-na baten official-rangko kamo donataha ine a·dokni Chief Electoral Officer (CEO) FR Kharkongor parakataha.
Kharkongor-ni parakatani gitade, election-ni somoio presiding officer, polling officer-rang, sector, zonal, micro observer aro assistant expenditure officer-rangko man·chape dingtang dingtang kamrangko ka·na gita sak 18,500-mangni official-rangko department nangenga.
A·dokni pilak a·jarangon election-ni kamrangko ka·chichaengaha ine janapatengon, ia pilak a·jarangon training aro gipinrangko a·bachengmanaha ine CEO parakataha.
Assembly election-na notification ba u·iataniko January 31 tariko dakani ja·man nomination aro scrutiny-koba dakna siengani gimin election official-rang, ia kamrangna tarisotokengaha ineba Kharkongor parakataha.
CEO-ni parakatani gitade, Assembly election-ko tom·tome ong·atna man·na gita ma·mongni dol 120 central armed paramilitary force (CAPF)-rangko a·dokona bi·ataha aro ianoni dol 40 CAPF-rangde a·dokona sokbamanaha.
Election-ni somoio pilak a·jarango jakkalna gita BU, CU aro VVPAT-rang baksana EVM-rang 150%-na baten donga ineba Kharkongor parakataha.
Meghalaya a·dok gimiko ‘bilgrigipa’ dam 747 polling station-rang donga aro dam 399 polling station-rangkoba dingtang dingtang a·selrangni gimin kenchakna nanggipa polling station ine chanaha ineba CEO parakataha.
