SHILLONG: A·dokni cabinet minister Dasakhiatbha Lamare, a·dokni gitcham home minister HDR Lyngdoh, gitcham MLA Mohendro Rapsang aro gipin candidate-rangba Sukrobar salo, re·baenggipa February 27 tariko ong·atenggipa Assembly election-o susana gita nomination-ko file ka·angaha.
A·dokni cabinet minister Dasakhiatbha Lamare, Nongkrem constituency-o NPP-ni candidate ong·e susana gita nomination file ka·aha aro Mohendro Rapsang-ba West Shillong constituency-o NPP-ni candidate ong·e susana nomination file ka·angskaaha.
Gitcham home minister HDR Lyngdoh, Sohiong constituency-oni UDP-ni tikito susana gita nomination file ka·angskaaha.
Sukrobar salo Congress dolni adita sak candidate-rangba nomination-rangko file ka·angaha aro uamangara, Pynursla constituency-na Nehru Suting, Mawphlang-na Dannyson Kurbah, Mawlai-na Marbud Dkhar, Sohiong-na Osborne Kharjana aro Mawsynram constituency-na Gopal Stone Hynniewta ong·a.
Gitcham MLA Donkupar Massar-ba ia election-o Pynursla constituency-oni Independent candidate ong·e susana gita an·tangni nomination-ko file ka·angaha.
An·tangni nomination-ko file ka·angani ja·man Nongkrem constituency-ni NPP candidate Dasakhiatbha Lamare, kobor ra·timgipa manderang baksa agangrikengon, ia election-o manderangko salna tangka paisarangko jakkalenga ine matnanganiko jegalatenba, ua manderangko dakchakna gitasa tangka paisarangko sualaha aro vote-rangko brena gitade manderangna tangka paisarangko on·jahachim ine talataniko on·angaha.
Gipin constituency-oni ba a·dokni gipin biaprangoni manderangnaba ua dakchakanirangko nangenggipa manderangnade dakchakanirangko on·na kusi ong·aigen ineba Lamare parakataha.
Ua Mawhati constituency-ni MLA ong·eba da·o Nongkrem constituency-o susaskaengani gimin sing·on, uko Nongkrem constituency-ni manderangsa ia biapo susachina nangnikaha ine Lamare parakataha.
A·dokni gitcham home minister HDR Lyngdoh-ba ia election-o chepiltaina ka·dongenganiko parakataha.
