SHILLONG: Re·baenggipa February-ni 27 tariko ong·atenggipa Meghalaya Legislative Assembly election-o Trinamool Congress, damgni ba damgittam seat-rangna bate chena man·jawa ine Sukrobar salo, a·dokni Chief Minister aro National People’s Party (NPP)-ni national president Conrad K Sangma, Jowai-o NPP-ni election manifesto-ko oprakna gita jinma tom·bimonganiko ong·atanio parakataha.
“Anga namen ma·sia, ia election-o TMC man·genchimoba seat damgni ba damgittamkosan cheaigen aro ia seat-rangkoba uamang neng·esa chegen. Uamang jinma tom·bimonganirango jekoba aganchina indiba March-ni 2 tariko election-ni result-ko parakatahaon uamang seat damgnikosan cheaigen. Iako na·simang nie dongaibo,” ine Sangma aganaha.
Ia chang election-ba NPP, bang·bata seat-rangko chee bilona re·bapiltaigen ine janapatengon, TMC dolde a·dokna maming ka·donganirang dongja ine manderangko, TMC-na pu·one an·tangtangni vote-rangko nisigaljachina didiataha.
Gitcham Congress sorkarini somoio, a·dokni manderangko bil jakkalesa sason ka·na jotton ka·na jotton ka·aha ineba ua, TMC-ni dilgipa aro a·dokni gitcham chief minister Mukul Sangma-ko matnange aganangaha.
NPP-chi dilanggipa a·dok sorkariko bilgrigipa sorkari ine matnanganiko jegalatengon, “Gitcham Congress sorkarini somoio Mukul Sangma, silchidarerangko aro sipai dolrangko jakkale manderangko sason ka·ahani giminsa da·alo NPP sorkariko ‘bilgria’ ine aganenga indiba bil jakkale sason ka·anikosa uamang bilaknikenga ong·ode uko uamang raken jegalgen,” ine Sangma parakataha.
TMC dolara West Bengal a·dokni party-sa ong·a aro gipin a·dokko sason ka·gipa dol maming dakeba Meghalaya a·dokni manderangko simsak nirokna gisik nangjawa ineba Sangma matnangataha.
