TURA: Meghalaya a·dok gimikon National People’s Party (NPP)-ni balwa bilakbee balenga ine Sombar salo NPP-ni national president Conrad K Sangma parakatenba, gipin political dolrangna pu·one an·tangtangni vote-rangko nisigaljachina aro NPP-kon seokchina gita manderangko didiangaha.
Sombar salo ua 57-Dalu constituency-ni NPP candidate Brening A Sangma-na Machangpani-o campaign ka·angengmiting somoio ia kattarangko aganaha.
“2023 bilsina a·dok gimikon politics-ni balwarang balenga. A·dok gimikon manderangni ku·rang NPP-nan gam·enga aro ia election-o NPP chegopna gita sienga,” ine Sangma aganaha.
FOCUS aro FOCUS Plus programrangara ma·mong sorkarini scheme-rangsa ong·a ine manderangna tol·e on·jachina gitaba ua BJP-ko didiangaha.
Ma·mong sorkarini ra·gate on·gipa PM Kisan scheme-ni gimin janapatengon, ian dingtang program ong·a indiba a·doko bang·bata game ge·e cha·giparangan an·tangtangni a·arang dongjani gimin ia program-ko a·doko jako ra·na man·jaha ine NPP-ni national president parakataha.
NPP baksa susaanio BJP maming cholrangko nikjaengani giminsa a·dok sorkarini ra·gatgipa scheme-rangni giminba manderangna tol·e aganenga ineba ua aganaha.
Ia election-oba BJP, seat damgnina bate chena man·jawa aro NPP-na maming nangchakeaniko ra·bana man·jawa ineba NPP-ni national president parakataha.
Ia tom·bimonganio MDC Dhormonath Sangma-ko man·chape BJP-ni bang·bea dilgiparang NPP-o napangtokaha.
