Assembly election-o vote-rang priprataigen ine PDF prez ku·watsoa

SHILLONG: Meghalaya a·doko batanggimin chang election-rango gitan ia chang Assembly election-oba vote-rang priprataigen ine Sombar salo People’s Democratic Front (PDF)-ni president Banteidor Lyngdoh parakataha.
Sombar salo ua, Mawkynrew constituency-o susataina gita nomination-ko file ka·angaha aro an·tangni nomination-ko file ka·angani ja·man kobor ra·timgipa manderang baksa agangrikengon, pilak political dolrangan bang·bate seat-rangko chena krengtokgen ine Lyngdoh parakataha.
“Meghalaya a·dokni itihasko niatgenchimode election changantian vote-rang priprae, election-ni ja·man dingtang dingtang dolrangni nangrime sorkari rikanikosa nikna man·ronga. Uni gimin angni nikani gitade, ia changoba apsan obosta ong·taina sienga,” ine ua aganaha.
Ia chang Assembly election-o uni PDF dol, komibeoba damsni ba damchet seat-rangko chee name dakna ka·dongenga ineba Lyngdoh parakataha.
PDF president-ni parakatani gitade, election-ni ja·man nangrimna gita uamang, gipin dolrangko basegen.
“Saksa dilgipa ong·e anga pangnan tangka jakkalsretani kosako ku·rangko on·ronga. Tangka jakkasretaniko an·ching bon·atna nangenga aro mongsongbate Meghalaya a·dok gita chonchongipa a·dokrango,” ine PDF-ni president aganaha.
Lyngdoh-ni parakatani gitade, uni kamrangni gimin manderangde jekoba aganainaba gnang indiba ua an·tangde saksa agriculture minister ong·e an·tangni constituency-nasan ong·aigija a·doko game ge·e cha·giparangna bang·en namgnirangko ra·baahachim.
A·dokni sports minister ong·eba ua bang·en dingtanganiko ra·bana man·aha ineba Lyngdoh aganaha.
“Chingni chu·sokatna man·gipa kamrangoni mingsade indita bilsirangni ja·man Meghalaya Games-ko a·doko ong·attaina man·aha. Chinga Northeast Olympic-koba name chu·sokatna man·aha maina indita dal·begipa kal·susaaniko a·doko sokachakna man·gen ine darangba chanchisoa dongjachim,” ine PDF president aganaha.
Manderangni una ka·saani aro bakrimanichi ua ia changoba seokako man·piltaigen ineba Lyngdoh, an·tangni ka·dongchakenganiko parakataha.