TURA: North Garo Hills a·jani bang·bata constituency-rangon pilakni gitan maming namroro silroroaniko nikna man·jaengani giminsa dingtanganiko ra·bana gita ia Assembly election-o susaenga ine adita sak candidate-rang, ia kobor ra·timgipana parakataha.
Mendipathar constituency-o Indian National Congress (INC)-ni candidate ong·e susaenggipa Timjim Momin-ni aganani gitade, uni constituency-o pilakni gitan aro mongsongbate an·seng baljokaniko on·ani, gama ge·ani, lekka pora aro BPL nokdangrangna kamrangko ka·anio maming namdapanirang dongjaengani gimin ua dingtanganiko ra·bana miksonge ia election-o susaenga aro ua ia election-o chena gita ka·dongenga.
Mendipathar constituency-o ua, da·o ong·enggipa MLA aro NPP-ni candidate Marthon Sangma, BJP-ni candidate Sengnab Momin, AITC-ni Pardinand D Shira, UDP-ni Subroto Marak aro Independent candidate Alberth Marak baksa susagrikengachim.
Apsan constituency-o Independent candidate ong·e susaenggipa Alberth Marak, ia election-o BJP-ni tikitchi susana miksonganirang dongachim indiba tikitko gipinna on·skaahani gimin ua Independent candidate ong·e susaskana nangnikaha ine parakataha.
Manderangni nangan somoirango aro mongsongbate COVID-19 sajinmani somoirangoba ua manderangna aro mongsongbate kangal cholgrirangna dakchakanirangko on·ahani gimin ia election-o bang·a manderangan una chakpaanirangko on·enga ineba Alberth Marak parakataha.
A·doko lekka porani kamrangnan gisik on·bate kamko ka·gen ine ku·rachakaniko on·eba a·dokni chief minister Conrad Sangma, lekka porani kamrangko namdapatna gita maming ja·kurangko de·jaha ineba Marak matnangataha.
Bajengdoba constituency-o Independent candidate ong·e susaenggipa Rocky Marak-ba ia election-o BJP-ni tikitchisa susana miksonganirang dongachim indiba tikitko gipin candidate-na on·skaahani gimin uaba Independent candidate ong·e susaskaenga ine parakataha.
2018 bilsini Assembly election-o Rocky Marak, United Democratic Party (UDP)-ni candidate ong·e susaskaahachim indiba chu·sokna gita man·jahachim.
Bajengdoba constituency-ni a·bri jolrango bang·a manderangan una chakpaengani gimin ia election-o ua chu·sokgipa ong·na ka·dongenga ine Rocky parakataha.
“Bajengdoba-ni a·kawe jolrangode vote-rang priprae bon·aigen indiba a·brirangode angna chu·onga gita vote-rang dongenga,” ine Rocky, an·tangni ka·dongchakenganiko parakataha.