TURA: A·chik Baptist Dal·gipa Krima (ABDK)-ni chang 149-gipa soba ba bilsini tom·bimonganiko re·anggipa February 9 tarikoni 12 tarikona ABDK-ni Permanent Campsite, Balupara songo skanggipa changna ong·atangaha.
Ia ABDK sobao KCF-ni Senior Pastor Rev Ashok Andrews, salantian Isolni namgipa kattarangko aganprakangaha aro bang·a janggirangkon Isolona rimbana gita man·aha.
Bon·kamgipa sal, chong·motan mijal Robibar salni tom·bimonganiko Jamgao Sorokpara Baptist Mondolini Pamong Sengman B Sangma dilangaha aro Sastroni rongtalgipa kattarangko Krima XV-ni Executive Secretary Dikseng N Sangma poraiatenba, dingtang dingtang nanganirangna Nokgipa Isolo bi·dilangaha.
Robibar salni tom·bimonganio Rev Dallim S Sangma uni ripengrangna agreba Krima IV-ni me·chik pamongrangba gitrangko ring·mittelangskaaha.
Ia ABDK sobako ong·atanio pringantian pring 7:30 bajioni 8:30 bajiona Bible Study-koba ong·atangaha aro ia Bible Study-koba Rev Andrews dilangaha.
Bon·kamgipa salo, a·dokni Chief Minister Conrad K Sangma aro uni nokdangni manderangba dongpae bakko ra·angaha.
