SHILLONG: Meghalaya a·doko bang·bata political dolrangan gital chief minister-ko songani bidingo da·o dipet chanchia dongkujaengon, United Democratic Party (UDP)-de a·dokko dilna gita Khasi-rangonikon gital chief minister ong·aniko nangnikenga ine u·iataha.
Sonibar salo, Mawlai-ni UDP-ni candidate Process T Sawkmie, gital a·dok sorkariko dilna gita Khasirangoni gital CM ong·china gita okamaniko on·angaha.
“Gital sorkariko dilna gita an·ching Khasi manderangoniko nangenga. 2010 bilsionin bilsichetna Dr Mukul Sangma, chief minister ong·angaha aro uni ja·man bilsi bongana sakgipin Sangma (Conrad K Sangma) chief minister ong·angskaaha. Indide an·chingni Khasi jong-adarangoni Lyngdoh, Syiem, Kharkongor aro uandakgipa chatchirangonira bao? Maini gimin an·ching Khasirangoni CM ong·na man·jaenga?” ine Sonibar salo, Mawlai Iewrynghep Dorbar-ni gita Mawlai Presbyterian Higher Secondary School-o ‘common platform’-ko ong·atanio Sawkmie aganaha.
A·chik chief minister-rangde namroro silroroani kamrangko Garo Hills-onasa ra·angenga ine janapatengon, international standard stadium-ko Shillong-o rikgen ine ka·susagipa manderangde ka·dongsoengachim indiba ia stadium-ko Tura-osa rikskaaha ine Sawkmie parakataha.
“A·dokni skanggipa state university-koba Tura-osa rikna sienga aro ian Garo Hills-ni CM ong·rongenganichi an·chingnade gimaani ong·enga ine mesokani ong·enga. Uni gimin mongsonggipa project-rangko Garo Hills-mangmangonasan ra·angaigija an·chingoba ra·na man·na gita Khasi aro Jaintia Hills-ni CM-ko nangenga,” ine UDP-ni candidate aganaha.
1972 bilsio Meghalaya a·dokko man·chengaoni gimik sak 12 chief minister ong·angahachim aro ia sak 12-oni saksnide Khasi Hills joloni ong·ahachim ine nikna man·a. Khasi Hills joloni ia saksni chief minister ong·anggipa manderangara, Darwin Diengdoh Pugh, Brington Buhai Lyngdoh, Donwa Dethwelson Lapang, Evansius Kek Mawlong, Dr Flinder Anderson Khonglam, J Dringwell Rymbai aro Dr Donkupar Roy ong·achim.
Meghalaya a·dokko man·chengaoni Garo chief minister ong·anggipa manderangara, Capt. Williamson Ampang Sangma, Purno Agitok Sangma, Salseng C Marak, Dr Mukul Manda Sangma aro Conrad Kongkal Sangma ong·skaengachim.
